Էջմիածնում «բեզպրիդել» է. Մանվել Գրիգորյանի ընտանիքի գլխին սև ամպեր են կուտակվել
«Ժողովուրդ» օրաթերթը գրում է. «ԱԺ ՀՀԿ խմբակցության պատգամավոր Մանվել Գրիգորյանի հետ կատարվածից հետո Էջմիածնում պարզապես բեսպրեդել է: Ընդ որում` այդպիսի վիճակ էր նաև թավշյա հեղափոխությունից հետո, երբ Մանվել Գրիգորյանն իրեն Էջմիածնում նախկինի պես չէր պահում: Իրավիճակը խորացավ արդեն նրա որդու` Էջմիածնի նախկին քաղաքապետ Կարեն Գրիգորյանի հրաժարականը պահանջողների ցույցերի ժամանակ և նոր թափ ստացավ Մանվել Գրիգորյանի ձերբակալությունից հետո:
Մասնավորապես, «Ժողովուրդ» օրաթերթին պարբերաբար տեղեկություններ են ստացվում քաղաքում տիրող իրավիճակի, մթնոլորտի և էջմիածինցիների քայլերի մասին: Ամբողջ քաղաքում այնպիսի իրավիճակ է, որ նույնիսկ Գրիգորյանների բարեկամները, նրա ընտանիքի անդամներն անգամ չեն փորձում փողոց դուրս գալ, քանի որ ամենուր նրան ծաղրող պաստառներ են, բռնության սպառնալիքներ հնչեցնելու պատրաստ քաղաքացիներ:
Բանը հասել է նրան, որ Մանվել Գրիգորյանի ընտանիքի անդամներին պատկանող բիզնես-օբյեկտներից ոչ մեկը չի աշխատում. բոլորը փակ են և կրկին քաղաքացիների ցասումից խուսափելու նպատակով, քանի որ քաղաքում չեն դադարում խոսակցություններն այն մասին, որ տարբեր ժամանակներում Մանվել Գրիգորյանից և նրա ընտանիքից տուժածները, հարմար առիթն օգտագործելով, կարող են վենդետա իրականացնել: Ինչպես արդեն նշեցինք, ամբողջ Էջմիածնում Մանվել Գրիգորյանին ծաղրող պաստառներ են. նրա լուսանկարները «տուշոնկաների» հետ: Այդպիսի լուսանկարներ փակցված են անգամ ԵԿՄ շենքի և Գրիգորյաններին պատկանող շինությունների պատերին:
Իրականում Էջմիածնում տիրող իրավիճակը կարող է վատ հետևանքներ ունենալ: Այդ քաղաքում մշտապես թշնամիներ համարվող երկու կլանների ղեկավարները` Արթուր Ասատրյանը (Դոն Պիպո) և Մանվել Գրիգորյանը կալանավորված են, այսինքն` չեզոքացված: Սա էլ նշանակում է, որ այժմ քաղաքում թելադրող չեն կարող համարվել նաև նրանց կլանի ներկայացուցիչները կամ մտերիմները, և այդ պատճառով էլ քաղաքում նոր մանվելներ և պիպոներ են ծնվում, արդեն իրենց սեփական կլանը ստեղծում, հարցեր լուծում: Եվ բանը հասել է նրան, որ Էջմիածնում ցանկանում են իշխել և թելադրող լինել արդեն երկար տարիներ արտասահմանում ապրածները: Օրինակ, մեր տեղեկություններով, Սանկտ-Պետերբուրգից ևս մարդիկ են եկել, ովքեր փորձում են Էջմիածնի «նայողը» համարվել: Իսկ ահա ոմն Էդվին, ով գործարար է և Էջմիածնում առևտրի կենտրոն ունի, ցանկանում է քաղաքապետ դառնալ: Ընդ որում` մեր տեղեկություններով` նա հենց Դոն Պիպոյի թեկնածուներից է, քանի որ վերջինս իր հաջողության հարցում այնքան վստահ է եղել, որ անգամ քաղաքապետի թեկնածու էր պատրաստել: Եվ չնայած Պիպոն կալանավորված է, սակայն Էդվինը շարունակում է քաղաքապետի թեկնածուն համարվել, այդ ուղղությամբ քայլեր անել:
Միայն թե, արձանագրենք` Էջմիածինը «զոն» չէ, ու եթե հետագայում պետք է այնտեղ նոր «նայողներ» լինեն, ապա ցավով կարձանագրենք՝ հեղափոխությունը գոնե այստեղ չի հասել իր նպատակին: Եվ ուրեմն, որպեսզի նոր «նայողներ» չհայտնվեն, պետք է պետությունն իրադրությունն իր ձեռքը վերցնի, պետք է լինի օրինական ընտրված քաղաքապետ և քաղաքը ղեկավարի, հակառակ դեպքում ոչինչ էլ չի փոխվի և ջրից հելնելով` կընկնենք ջրհորը: Սակայն ո՛չ իշխանությունն է տեղից շարժվում, ո՛չ էլ ոստիկանությունը: Ընդ որում` վերջիններիս անգործությունը տեսանք նաև ցույցերի օրերին, երբ Էջմիածնում փողոցներ էին փակվում, սակայն ոստիկանությունը տեղից այդպես էլ չէր շարժվում:
Իրավիճակն այնպիսին է, որ Մանվել Գրիգորյանին պատկանող 12 գազալցակայանները և մյուս բիզնեսները չեն աշխատում: Ընդ որում` լուրեր են շրջանառվում, որ ինչ-որ խմբեր թույլ չեն տալիս այդ օբյեկտներն աշխատեցնել: Սա էլ արդեն ՊԵԿ-ի գործառույթն է, սակայն վերջինս անտարբեր է, և դրա փոխարեն կան մարդիկ, ովքեր փորձում են տիրանալ դրանց «չորով»: Ի վերջո, այդ բիզնեսները պետք է կա՛մ աշխատեն, կա՛մ անցնեն պետության ձեռքը: Չպետք է թողնել, որպեսզի վրեժխնդրության պատճառով և հեղափոխության անվան տակ փողոցային խուժանը կրկին անցնի գործի»:
Առավել մանրամասն՝ թերթի այսօրվա համարում: