Սերժ Սարգսյանը հեռացել է, բայց հանրապետական կուսակցությանը դեռ դիմադրելու ենք. Արարատ Միրզոյան
ԱԺ «Ելք» խմբակցության պատգամավոր Արարատ Միրզոյանն իր ելույթում նշեց.
«Սիրելի ժողովուրդ, երբ ես վառեցի ազատության ջահը ԱԺ-ում, ես երազում էի այսօրվա մասին։ Ես երազում էի, որ ձեր առաջ վառեմ ու ասեմ՝ կեցցեք դուք, որ վառ պահեցիք ազատության ջահը:
«Այս քանի օրը, դեռ մինչև այս հաղթանակը, երբ ակնհայտ էր, որ զարթոնք է, փողոցներում մարդիկ մոտենում՝ շնորհակալություն էին հայտնում այդ հնարավորության համար։ Մենք ենք շնորհակալ, կեցցեք։ Դուք արել եք անհնարինը, այն, ինչ բոլորս ենք արել, աննախադեպ է, աշխարհում նման բան չկա։ Ես մինչև հիմա չեմ կարողանում հավատալ. առանց արյան, առանց դրսի փողերի, առանց արտաքին կողմնորոշման, առանց ոչ մի բանի, բաց ձեռքերով դուք հաղթել եք»,- ասաց նա՝ ընդգծելով, որ ՀՀԿ-ն դեռ դիմադրելու է, և պետք է մինչև վերջ գնալ։
«ՀՀԿ-ն Հայաստանում իշխանություն չի լինելու»,- նշեց պատգամավորը՝ հավելելով. «Ոլորտ առ ոլորտ, քայլ առ քայլ մենք պետք է կերտենք մեր երազանքների Հայաստանը»։
Նրա խոսքով՝ դրանով էլ չի վերջանալու, անելիքները շատ են. «Մի քանի բան ասեմ, որ հետո եթե չանենք, մեզանից կպահանջեք. օլիգարխները, բիզնեսմենները պետական իշխանության մեջ ներգրավված չեն լինելու։ Պետական իշխանության մեջ ներգրավված մարդիկ բիզնես արտոնություններ չեն ունենալու։ Մենք պետք է կարգավորենք ԸՕ-ն և ամբողջ ընտրական համակարգը, Հայաստանում այսուհետ միայն ազատ, արդար ու թափանցիկ ընտրություններ են լինելու։