Ինձ հարցրել են՝ պատրա՞ստ եք վարչապետի պաշտոնը ստանձնել, ասել եմ՝ այո. Կարեն Կարապետյան (տեսանյութ)
Այսօր ԱԺ-ում կառավարության հետ հարցուպատասխանի ժամանակ «Ելք» խմբակցության պատգամավոր Էդմոն Մարուքյանը հայտարարեց, որ վարչապետ Կարեն Կարապետյանի` Լիբանան այցի ժամանակ հայտարարել է, որ ունենալու ենք զարգացող երկիր, բիզնեսի համար լավ միջավայր, լիբանանահայ գործարարները կարող են գալ և ներդրում կատարել մեր երկրում:
Սակայն, ըստ Մարուքյանի, մի խնդիր կա` ՓՄՁ ոլորտի տարբեր կազմակերպություններ կան, և վերնագրեր կան` «ՓՄՁ-ն շնչահեղձ է լինում», «Հարյուրավոր բիզնեսներ փակվում են»: Նա նշեց, որ երկու մեսիջ է գնում Հայաստանից` ամեն ինչ լավ է, ամեն ինչ վատ է.
«Գիտեմ դեպք, որ միջազգային դատարան են ուզում դիմել Հայաստանում ներդրողին «քցելու» համար: Այս ֆոնին ինչպե՞ս եք պատկերացնում ներդրումներ բերելը»:
Մարուքյանը նաև հետաքրքրվեց, որ երբ վարչապետի հարցը առկախված է, դա ինչպե՞ս է ազդում բիզնեսի վրա:
Վարչապետ Կարեն Կարապետյանը պատասխանեց, որ իր ասածի մեջ հակասություն չկա, և իրենք չեն ասում` ամեն ինչ լավ է.
«Կառավարությունում ռեգուլյար աշխատում ենք բիզնես պայմանների լավացման վրա, հստակ գիտենք՝ ինչն ենք փոխել, հստակ գիտենք, որ մասն է բերել տնտեսական աճ, և ես հավատացած եմ, որ յուրաքանչյուր մեր սփյուռաքահայ ներկայացուցիչ կարող է մաս կազմել տնտեսության զարգացման»:
Անդրադառնալով վարչապետի փոփոխության մասին խնդրին` Կ.Կարապետյանը նշեց, որ իրենց խնդիրն է, որ անձից կախված չլինի բիզնեսը, և սպասումները չպակասեն, բայց մարդիկ կան, որ դրան արձագանքում են:
Է.Մարուքյանը հիշեցրեց, որ Կարապետյանն ասել էր, որ պատրաստ է վարչապետ աշխատել, բայց հիմա առաջին փոխվարչապետ է աշխատելու, արդյոք պատրա՞ստ է դրան:
«Դրա քննարկումը եղե՞լ է, որ ասեմ` պատրա՞ստ եմ, թե՞ չէ»,- հարցադրումով պատասխանեց վարչապետը: