2020-2022 թվականներին ատոմային էներգետիկայի տեսակարար կշիռը կկազմի ավելի քան 40 տոկոս. նախարար (ուղիղ)

Կառավարությունը որոշել է շահագործել գործող Հայկական ատոմակայանի գործող էներգաբլոկը որքան հնարավոր է, որից հետո կորոշեն, թե երբ կառուցել նոր էներգաբլոկը և ինչ տեխնոլոգիայով: Այս մասին, այսօր՝ մարտի 21-ին, ԱԺ-ում էներգետիկ համակարգի վերաբերյալ «Ելք» խմբակցության հարցապնդման քննարկման ժամանակ նշել է Էներգետիկ ենթակառուցվածքների և բնական պաշարների նախարար Աշոտ Մանուկյանը:

Նրա խոսքով, այսօր՝ էներգետիկ ոլորտում մոտ 33 տոկոսը ատոմային էլեկտրաէներգիայի բաժինն է, նույնքան տեսակարար կշիռ ունեն սեփական վերականգնվող աղբյուրներից հոսանքի արտադրությունը և գազային համակարգը:

«Այժմ իրականացվում է երկրորդ էներգաբլոկի ժամկետի երկարաձգման և արդիականացման ծրագիր, որով միջուկային էներգիայի արտադրությունը կավելանա 10 տոկոսով: 2020-2022 թվականներին ատոմային էներգետիկայի տեսակարար կշիռը կկազմի ավելի քան 40 տոկոս»,-ասաց նախարարը:

«Ելք» խմբակցության ղեկավար Նիկոլ Փաշինյանի դիտարկմանը, որ դեռևս 2017-ի հոկտեմբերին Սերժ Սարգսյանը հայտարարել է, որ Հայաստանն սկսում է նոր ատոմակայանի կառուցում, Աշոտ Մանուկյանն արձագանքեց. «Այսօր Հայկական ատոմակայանն ի զորու է շարունակել իր աշխատանքը որոշակի ախտորոշիչ աշխատանքներից հետո, որից հետո կարող ենք որոշել, թե որքան կյանք այն կարող է ունենալ: Հիմա կառուցել նոր էներգաբլոկ, եթե ունենք գործողը, որը կարող է անխափան ու անվտանգ շահագործվել որոշակի տարիներ, որքանո՞վ է դա նպատակահարմար»:

Նրա խոսքով, միջուկային տեխնոլոգիաները շատ արագ զարգանում են, ևեթե սրանից 5 տարի առաջ մենք ունեինք այլընտրանք երկու տարբեր տեխնոլոգիաների միջև, այսօր ունենք առնվազն 5 այլընտրանք, որոնցից յուրաքանչյուր հաջորդն ավելի անվտանգ է, ավելի հուսալի է. «Հետևաբար, որոշումը եղել է հետևյալը՝ շահագործել գործող էներգաբլոկը որքան հնարավոր է, որից հետո կորոշենք, թե երբ կառուցել նոր էներգաբլոկը և ինչ տեխնոլոգիայով»: