«Արարատ-73» ֆուտբոլային թիմի անդամները և մարզական մեկնաբան Ռուդիկ Բարսեղյանը պարգևատրվել են (լուսանկարներ)

ՀՀ ԱԺ մամուլի ծառայությունից տեղեկանում ենք, որ նախագահ Արա Բաբլոյանի կարգադրությամբ սպորտի և հասարակական գործունեության բնագավառներում ունեցած նշանակալի ավանդի համար ՀՀ ԱԺ պատվո մեդալով են պարգևատրվել «Արարատ-73» ֆուտբոլային թիմի անդամներ Արկադի Անդրեասյանը, Ալյոշա Աբրահամյանը, Սերգեյ Պողոսյանը, Նորայր Մեսրոպյանը, Սուրեն Մարտիրոսյանը, Նիկոլայ Ղազարյանը, Էդուարդ Մարգարովը, ՀՀ ԱԺ նախագահի հուշամեդալով՝ մարզական մեկնաբան Ռուդիկ Բարսեղյանը:

«Այն, ինչ 1973 թվականին իրագործեցիք դուք և Երևանի «Արարատ» ֆուտբոլային ակումբի ձեր խաղընկերները, իսկապես հերոսություն էր՝ հաշվի առնելով, թե ինչպիսի մրցակցության պայմաններում կարողացաք նվաճել Խորհրդային Միության չեմպիոնի կոչումը և ԽՍՀՄ գավաթը»:

Նրա խոսքով՝ այդ լուրջ պայքարում հայ ֆուտբոլիստները հաղթող դուրս եկան՝ կարողանալով մեր ժողովրդին պարգևել կրկնակի հաղթանակի բերկրանք ու հպարտության պահեր:

«Հավատացեք, այսօր 45 տարի անց էլ մենք ոչ պակաս հպարտություն ենք ապրում: Դուք հայ ժողովրդի համար լեգենդար անձնավորություններ եք»,-նշել է ՀՀ ԱԺ նախագահը:

ՀՀ ԱԺ նախագահի տեղակալ Էդուարդ Շարմազանովը ևս շնորհավորել է արարատցիներին՝ ընդգծելով, որ այս տարին հոբելյանական է մեր ժողովրդի համար. պետք է նշվի Հայաստանի առաջին հանրապետության հռչակման 100-ամյա հոբելյանը, արցախյան շարժման 30-ամյակը, ինչպես նաև «Արարատ 73»-ի կրկնակի հաղթանակի 45-ամյակը: