Հայաստանից ԵՄ արտահանման քանակը անցած տարվա տվյալներից գերազանցում է

Դեկտեմբերի 15-ին Երևանում կայացած Եվրոպական բիզնես ասոցիացիայի 2-րդ գագաթաժողովի կուլուարներում լրագրողների հետ զրույցի ընթացքում նման կարծիքը հայտնեց Հայաստանի տնտեսական զարգացման և ներդրումների փոխնախարար Գարեգին Մելքոնյանը:

Հայաստանի և Եվրամիության (ԵՄ) միջև ստորագրված համապարփակ և ընդլայնված գործընկերության մասին համաձայնագիրը երկար տարիների լուրջ իրավական հիմք կդառնա բոլոր առաջնահերթ ոլորտներում հայ-եվրոպական հարաբերությունների զարգացման համար:

Նրա խոսքով՝ փաստաթղթի՝ ուժի մեջ մտնելուց հետո մեծ աշխատանք է նախատեսվում իրականացնել տնտեսության և առևտրի տարբեր ոլորտներում եվրոպական փորձի և ստանդարտների ներդրման ուղղությամբ: Ինչպես նշեց փոխնախարարը, ստանդարտների ներդնումը կպարզեցնի վարչարարության ընթացակարգերը, ինչը, իր հերթին, կհանգեցնի Հայաստանի և Եվրամիության երկրների միջև ապրանքաշրջանառության աճի, հատկապես` Հայաստանից արտահանման:

«2017 թվականի 10 ամսվա ընթացքում Հայաստանից դեպի ԵՄ երկրներ արտահանման ծավալը 20 տոկոսով գերազանցել է նախորդ տարվա նույն ժամանակահատվածի ցուցանիշը: Միևնույն ժամանակ GSP+ համակարգի շրջանակներում ապրանքների 40 տոկոսը ԵՄ է արտահանվել զրոյական մաքսատուրքերով: Ինչպես հայտնի է, Հայաստանից Եվրոպա արտահանվող ապրանքների 90 տոկոսի համար մաքսատուրք չի վճարվում»,- հիշեցրեց փոխնախարարը` հավելելով, որ այս ցուցանիշի բարելավման համար առկա են բոլոր նախադրյալները:

Գարեգին Մելքոնյանը նաև նշեց, որ 2017 թվականին զգալիորեն բարելավվել է նաև Հայաստանից դեպի ԵՄ արտահանման կառուցվածքը, մասնավորապես, Հայաստանը սկսել է արտահանել ավելի շատ պատրաստի ապրանքներ, վերամշակված արտադրանք, դեղեր և տեքստիլ:

Նրա կարծիքով, 2018 թվականին Հայաստանի՝ REX գրանցված արտահանողների համակարգին միանալը բարենսպաստ ազդեցություն կունենա հատկապես ՓՄՁ-ների վրա, քանի որ համակարգը թույլ է տալիս գործարարներին առանց ապրանքի ծագման վկայականի, մեկ անգամ գրանցվելով REX համակարգում, դուրս գալ ԵՄ շուկաներ և օգտվել GSP+ արտոնություններից:

Հիշեցնենք, որ ԵՄ-ի հետ համապարփակ և ընդլայնված գործընկերության մասին համաձայնագիրը Հայաստանը ստորագրել է 2017 թվականի նոյեմբերի 24-ին: Փաստաթուղթը ստորագրվել է Բրյուսելում Հայաստանի արտգործնախարար Էդվարդ Նալբանդյանի և ԵՄ դիվանագիտության ղեկավար Ֆեդերիկո Մոգերինիի կողմից: