Եթե լիներ «Երթուղային տաքսի վարելու և երթուղային տաքսու ծառայություններից օգտվելու մասին» ՀՀ օրենք

Եթե լիներ «Երթուղային տաքսի վարելու և երթուղային տաքսու ծառայություններից օգտվելու մասին» ՀՀ օրենք.

Հոդված 1
1. Երթուղային տաքսին մարդատար մեքենա է:
2. Երթուղային տաքսին որպես կարտոֆիլ տեղափոխող բեռնատար մեքենա օգտագործելն արգելվում է:
3. Երթուղային տաքսին որպես ինքնաշեն ինքնաթիռ օգտագործելն արգելվում է:
4. Երթուղային տաքսին որպես մարդկանց գլուխն ուտելու համար նախատեսված սարք օգտագործելն արգելվում է:
5. Սույն հոդվածի 2, 3 և 4 մասերի խախտման դեպքում օրենքով նախատեսված դեպքերում և կարգով ուղևորը ստանում է մուննաթ գալու իրավունք:

Հոդված 2
1. Երթուղային տաքսին պարտավոր է նշված ժամին լինել նշված կանգառում:
2. Երթուղային տաքսու՝ ճիշտ ժամանակին չգալու պատճառով աշխատանքից ուշացող ուղևորը իրավունք ունի պահանջելու երթուղային տաքսու վարորդից կամ գծատիրոջից՝ իր փոխարեն ներողություն խնդրել կամ արդարանալ աշխատավայրում:
3. Երթուղային տաքսու՝ ճիշտ ժամանակին չգալու պատճառով համալսարանից ուշացող ուսանողը իրավունք ունի պահանջելու երթուղային տաքսու վարորդից կամ գծատիրոջից՝ իր փոխարեն լացել դասախոսի, իր ֆակուլտետի ամբիոնի վարիչի, համալսարանի գլխավոր քարտուղարի, ցանկության դեպքում նաև ռեկտորի մոտ՝ բացակաները զրոյացնելու համար:
3.1. Ուսանողն իրավունք ունի պահանջելու՝ հանձնել իր փոխարեն այն առարկայի քննությունը, որից ինքը ուշացել է:

Հոդված 3
1. Երթուղային տաքսու վարորդին արգելվում է մեքենայի մեջ միացնել այնպիսի երաժշտություն, որը կարող է ազդել ուղևորի հոգեկան առողջության վրա կամ հասցնել վերջինիս ինքնասպանության:
2. Ուղևորի ուղեղը մտած անորակ երաժշտության պատճառած անհարմարությունների համար պատասխանատվություն է կրում վարորդը:

Հոդված 4
1. Երթուղային տաքսի բարձրացող ուղևորը պարտավորվում է սպասել և բարձրանալ երթուղային միայն այն ժամանակ, երբ երթուղային տաքսուց նույն պահին իջնող ուղևորները արդեն լքած կլինեն մեքենան:

Հոդված 5.
1. Երթուղային տաքսու լիքը լինելը թույլ չի տալիս ուղևորին խախտել մեկ այլ ուղևորի անձնական տարածքը:
1.1. Երթուղային տաքսու լիքը լինելը թույլ չի տալիս ուղևորին հետույքը դեմ տալ մեկ այլ ուղևորի:
2. Ուղևորը իրավունք չունի խոսքով կամ հայացքով պահանջելու մեկ այլ ուղևորից՝ կանգնել և զիջել նրան իր տեղը:
3. Երթուղային տաքսի կանգնացնող ուղևորը իրավունք ունի չբարձրանալ մեքենա, եթե տեսնում է, որ նստելու բավարար տեղ չկա:
3.1. Ֆիզիկական կամ տարիքային որևէ խնդիր չունեցող ուղևորը, ով բարձրացել է լիքը լցված երթուղային տաքսի, պարտավորվում է կանգնել անտրտունջ մինչև որ մեքենայում բնական ճանապարհով տեղ կազատվի:

Արփի Բեկարյան.ֆեյսբուք: