Անչափահասի սպանության մեջ մեղադրվողը դիմել է Վերաքննիչ՝ մեղմ պատժի պահանջով
Երևանի Հույսի Ավան 2-րդ թաղամասում 2016թ. հունիսի 30-ին տեղի ունեցած վիճաբանության ժամանակ 16-ամյա Հայկ Ասիրյանի սպանության գործով 16 տարվա ազատազրկման դատապարտված Ռոբերտ Սահակյանը դիմել է Վերաքննիչ դատարան: Նա պահանջում է բեկանել Երևանի Աջափնյակ և Դավիթաշեն վարչական շրջանների ընդհանուր իրավասության դատարանի դատավճիռը եւ իր նկատամմաբ ավելի մեղմ պատիժ նշանակել:
Անչափահաս Հայկ Ասիրյանի սպանության մեջ մեղադրվում է նրա հարևան Ռոբերտ Սահակյանը: Ըստ մեղադրական եզրակացության, մեղադրանք է առաջադրվել այն բանի համար, որ նա ամուսիններ` Սահակ Ասիրյանի և Քրիստինե Մուրադյանի անձնական կյանքին միջամտելու, նրանց նորմալ հարաբերությունները խաթարելու եւ Սահակ Ասիրյանի հետ վեճ հրահրելու խուլիգանական դրդումներով Սահակ Ասիրյանին հրավիրել է առանձնազրույցի` հետաքրքրվելով թե ինչու չի պատժում կնոջը իր հետ տարիներ առաջ ինտիմ հարաբերություններ ունենալու համար: Ռոբերտ Սահակյանը իր կողմից ապօրինի կրած սառը զենք հանդիսացող զինվորական սվին-դանակով հարվածել է` Սահակ Ասիրյանին պաշտպանելու նպատակով իր թիկունքից մոտեցած Հայկ Ասիրյանի սրտին, որի արդյունքում Հայկ Ասիրյանը մահացել է: Դրանից հետո նույն դանակով հարվածել է եղբորը պաշտպանելու նպատակով իրեն մոտեցած Անդրանիկ Ասիրյանին` պատճառելով վերջինի առողջությանը, կյանքին վտանգ սպառնացող ծանր վնաս:
Ռոբերտ Սահակյանին մեղադրանք է առաջադրվել ՀՀ ՔՕ 104-րդ հոդվածի 2-րդ մասով՝ Սպանությունը և 235-րդ հոդվածի 4-րդ մասով՝ Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը: