Դանիել Իոաննիսյանն իր անձնական և ընտանեկան գաղտնիք համարվող տեղեկությունները տարածելու քրգործով տուժող է ճանաչվել

«Հայկական ժամանակ» օրաթերթը գրում է. «Իրազեկ քաղաքացիների միավորում» ՀԿ-ի ծրագրերի ղեկա­վար Դանիել Իոաննիսյանն իր անձնական և ընտանեկան գաղտնիք համարվող տեղեկությունները տարածելու դեպքի առթիվ հարուցված քրեական գործի շրջանակներում տուժող է ճանաչվել: Այս մասին մեր զրույցում ասաց Իոաննիսյանը՝ հավելելով, որ հարուցված քրեական գործի շրջանակներում հար­ցաքննվել է: Նշենք, որ այս գործի շրջանակներում դեռևս ո՛չ կասկածյալ կա, ո՛չ մեղադրյալ:

Հիշեցնենք, որ 2017թ. ապրիլի 2- ի ՀՀ Ազգային ժողովի նախընտրական քարոզչության ընթաց­քում ՀՀԿ օգտին վարչական ռեսուրսների կազմակերպված և լայնածավալ չարաշահումների վերաբերյալ «Իրազեկ քաղա­քացիների միավորում» ՀԿ-ի հրապարակված ուսումնասիրու­թյուններից երկու օր անց «Իրավունք» թերթում հրապարակվեց այդ կազմակերպության ներկայացուցիչ Դանիել Իոաննիսյանի ընտանիքին և անձնական կյանքին վերաբերող տվյալներ:

Վերջինս մեր զրույցում ասել էր, որ գործը ոչ թե ՀՀ քննչական կոմիտեն պետք է քննի, այլ՝ ՀՀ հատուկ քննչական ծառայությու­նը. պատճառաբանությունը սա էր. «Նման անձնական տեղեկու­թյունները պաշտոնատար անձինք են փոխանցել «Իրա­վունքին», հետևաբար այս գործով մեղադրյալ պետք է հանդի­սանան պետական պաշտոնատար անձինք ոստիկանության կամ ՔԿ կոնկրետ ծառայողներ: Հենց այս պատճառաբանու­թյամբ էլ քրեական դատավարության օրենսգրքի համաձայն գործը պետք է քննվի ՀՀ հատուկ քննչական ծառայությունում»:

Մանրամասները՝ «Հայկական ժամանակ» թերթի այսօրվա համարում: