Վերաբացվեց «Կառլեն Եսայանի անվան պոլիկլինիկան». ներկա էր նախագահը (տեսանյութ և լուսանկարներ)
Այսօր՝ դեկտեմբերի 3-ին, վերաբացվեց Երևանի «Կառլեն Եսայանի անվան պոլիկլինիկան»: Բացման հանդիսավոր արարողությանը ներկա էին նախագահ Սերժ Սարգսյանը, Երևանի քաղաքապետ Տարոն մարգարյանը, ՀՀ վաստակավոր բժիշկ Կառլեն Եսայանի կինը՝ Սառա Եսայանը, ինչպես նաև բազմաթիվ պաշտոնյաներ:
Մայրաքաղաքի Քանաքեռ-Զեյթուն վարչական շրջանում գտնվող այս համաբուժարանի հիմնանորոգման աշխատանքների և կահավորման ֆինանսավորումը՝ շուրջ 500 մլն դրամ, ամբողջությամբ իրականացվել է Եսայանների ընտանիքի կողմից:
Երևանի քաղաքապետի, առողջապահության ոլորտի պատասխանատուների և ՀՀ վաստակավոր բժիշկ, երջանկահիշատակ Կառլեն Եսայանի ընտանիքի անդամների ուղեկցությամբ Հանրապետության նախագահը շրջայց է կատարել բուժհաստատությունում, ծանոթացել իրականացված աշխատանքներին, առողջապահական որակյալ ծառայություն մատուցելու նպատակով հաստատությունում ստեղծված պայմաններին, զրուցել բուժանձնակազմի ներկայացուցիչների հետ:
ՀՀ նախագահին ներկայացրել են, որ բուժհաստատության ավելի քան 170 աշխատակիցների աշխատանքի և պոլիկլինիկայում հաշվառված շուրջ 45000 քաղաքացիների որակյալ սպասարկման համար ապահովված են անհրաժեշտ պայմաններ:
Շրջայցի ընթացքում ՀՀ առողջապահության նախարարության պատասխանատուները նախագահին ներկայացրել են նախարարության կողմից առողջության առաջնային պահպանման օղակում իրականացվող զանգվածային սկրինինգային ծրագրերի ընթացքը: Անդրադարձ է եղել նաև ամբուլատոր-պոլիկլինիկական օղակի աշխատանքների կազմակերպման խնդիրներին:
Հանրապետության նախագահի ներկայությամբ տեղի է ունեցել նաև ՀՀ վաստակավոր բժիշկ Կառլեն Եսայանի բրոնզաձույլ արձանի բացման արարողությունը:
Նշենք, որ պոլիկլինիկան ունի տարբեր բաժանմունքներ, հարուստ է ժամանակակից տեխնիկայով:
Աշխատակիցների խոսքով՝ Կառլեն Եսայանը եղել է շատ ճշտապահ և մյուսներից էլ պահանջում էր ճշտապահություն:
«Նա մի հրաշք անձնավորություն էր: Ես որ ընդունվել եմ աշխատանքի, նա այստեղ էր աշխատում: Այստեղ աշխատում եմ արդեն 16 տարի: Նա մարդ էր մեծատառով և ընկերական էր բոլորի հետ: Միշտ ասում էր՝ համբերեք, ամեն ինչ լավ կլինի, և դա իր կարգախոսն է եղել»,- պատմեց Մետաքսյա Կուջոյանը:
Նշենք, որ ավելի վաղ ՀՀ վաստակավոր բժիշկներ Կառլեն և Սառա Եսայանների կողմից իրականացվել են բազմաթիվ բարեգործություններ, իսկ այժմ բարի գործը շարունակում է Սառա Եսայանը: