Ծանր պայքարի մեջ ենք մտնում, ամեն քայլափոխի մեզ փորձելու են խաբել. Լևոն Զուրաբյան

Այսօր՝ հոկտեմբերի 28-ին, ԱԺ-ում տեղի ունեցած ճեպազրույցների ժամանակ ՀԱԿ խմբակցության ղեկավար Լևոն Զուրաբյանը, նշեց, որ իշխանական «կորիդոր»-ներից խոսակցություններ է լսում, որ որոշ ընտրակեղծարարներ իրենց պայմանավորվածության այդ մասն ուզում են ձախողել։ Խոսքը, ըստ նրա, վերաբերում է տեսախցիկների տեղադրմանը բոլոր ընտրատեղամասերում և ընտրական գործընթացի ուղիղ հեռարձակմանը:

«Ես ցանկանում եմ հայտարարել, որ տեսախցիկների տեղադրումը բոլոր ընտրատեղամասերում և ամբողջ ընտրական գործընթացի օնլայն հեռարձակումը մեր պայմանավորվածության անբաժան մասն է, որը պետք է իրականացվի: Եթե ցուցակների հրապարակումը երաշխավորում է, որ տեղամաս կմտնեն և կքվեարկենք ՀՀ-ում գտնվող ընտրելու իրավունք ունեցողը, ապա տեսախցիկների տեղադրումը ապահովում է, որ ընտրատեղամաս մտած և քվեարկած մարդկանց ձայները կհաշվարկվեն ճիշտ»,- ընդգծեց նա։

Լևոն Զուրաբյանի խոսքով՝ ընտրական գործընթացի օնլայն հեռարձակումը թույլ կտա վստահված անձանց կողմից ապօրինի ուղղորդման բացառումը, բռնությունները, կողմնակի անձանց ապօրինի կուտակումները, մանիպուլյացաները և այլն։

Ըստ նրա՝ առանց ուղիղ հեռարձակման, ընտրողների ցուցակների հրապարակումն անիմաստ է։

«Եթե որևէ պատճառով տեսախցիկների տեղադրման մասը չիրականացվի, ապա մենք բոլոր հիմքերը կունենանք առաջիկա ընտրությունները համարել կասկածելի՝ լեգիտիմության տեսանկյունից»,- պնդեց պատգամավորը և հավելեց,- «Խորհուրդ եմ տալիս բոլորին՝ առաջին հերթին իշխանություններին, կենտրոնանալ համաձայնագրի տարրերի վրա: Մենք կատակ չենք անում, մեր խոսքն ու ստորագրությունը կշիռ ունեն, և սպասում ենք նույնը բոլոր կողմերից, ովքեր իրնեց ստորագրությունը դրել են այդ փաստաթղթի տակ»

Նա ընդգծեց, որ սա դեռ չի երաշխավորում ընտրական գործընթացի թափանցիկությունը, և իշխանության կամքի բացակայությունը: Պետք է լրացնել հասարակական բարձր կամքով։

«Ծանր պայքարի  մեջ ենք մտնում։ Ամեն քայլափոխի մեզ փորձելու են խաբել և մեր գործն է լինելու այդ խաբեությունների դեմն առնելը»,- շեշտեց Լևոն Զուրաբյանը։