Վահրամ Բաղդասարյանը՝ Վիգեն Սարգսյանի նախարար նշանակվելու, Սեյրան Օհանյանի և Էդվարդ Նալբանդյանի վերանշանակումների մասին (տեսանյութ)
ԱԺ սեպտեմբերի 28-ի արտահերթ նիստը շարունակվում է: ՀՀԿ խմբակության ղեկավար Վահրամ Բաղդասարյանը լրագրողների հետ զրույցում, պատասխանելով այն հարցին, թե կառավարությունը գրեթե ձևավորվել է, բայց միայն ԱԳ և ՊՆ նախարարների հարցը դեռ պարզ չէ, ինչով է դա պայմանավորված, նա պատասխանեց. «Ո՛չ, ուշացում չկա, դուք նկատեցիք, որ դրան գնում ենք փուլային տարբերակով: Մենք ունենք 22-օրյա ժամկետ: 2 օրվա ընթացքում կլինի նաև մյուս նշանակումները»:
Այն հարցին, թե կվերանշանակվեն արդյոք նույն նախարարները, ինչպես նաև Վիգեն Սարգսյանի անունն էլ է շոշափվում՝ որպես այս երկու նախարարությունների նախարարի թեկնածու, նա նշեց. «Նման հարց չի քննարկվել: Վիգեն Սարգսյանն աշխատում է իր տեղում և շատ լավ աշխատում է որպես աշխատակազմի ղեկավար, իսկ մնացած հարցերի քննարկման հետ կապված ես տեղյակ չեմ»:
Սեյրան Օհանյանի վերանշանակման հետ կապված մեկ այլ հարցին, թե արդյոք որպես խմբակցության անդամ, նա կցանկանա Սեյրան Օհանյանին տեսնել նախարար, ՀՀԿ խմբակցության ղեկավարը պատասխանեց. «Սեյրան Օհանյանը, հակապես այս պատերազմական իրավիճակի մեջ իրեն դրսևորել է որպես բանիմաց ռազմական գործիչ: Ես որևէ վատ բան չեմ կարող ասել, եղել են նեգատիվ երևույթներ, որին դուք էլ ականատես եղաք և չի կարող նման ոլորտում թերություններ չլինեն, բայց թերությունների համար պետք է պատասխան տան բոլորը՝ անխտիր»:
Անդրադառնալով մեկ այլ հարցին կապված ԱԳ նախարարի պաշտոնակատարի բացերի մասին, նա ասաց. «Մենք արտաքին հարաբերությունների մեջ բավականին լուրջ հարաբերություններ ունենք, և բնականաբար, եթե, ԱԳ նախարարը Հայաստանում չէ, ուրեմն՝ կարևոր հարցերով նա դրսում է և ՀՀ շահերն է պաշտպանում»:
Մանրամասները՝ տեսանյութում: