Արդեն քանի շաբաթ է կառավարություն է ձևավորվում. խոսքն ու գործը պետք է համահունչ լինեն

Որքան հիշում եմ՝ արագ փոփոխություններ պետք է լինեին, բայց այս 3 շաբաթ է, կառավարություն է ձևավորվում, այս կամուկաց վիճակները, «ում պահեն, ում հանեն» խմբային հոգեբանական սոլիդարությունը, արդեն առնվազն արագ փոփոխության առումով խնդիրներ ունեն ու ցույց են տալիս, որ էս համակարգի համար հնից լավը չկա:

Պետք է խոսքն ու գործողությունը համահունչ լինեն, որ այն, ինչի համար այս ամենը ձեռնարկվեց, աշխատի, այսինքն՝ հանրության մոտ հույս ու հավատ ձևավորվի գոնե գործողության մեկնարկային փուլում:

Միևնույն է, համակարգը կենդանի օրգանիզմ է ու ունի իր զարգացման կանոնները, փիլիսոփայությունը: Եթե այդ համակարգը տևական ժամանակ անհաղորդ է մնում հանրային պահանջմունքներին և իրական անցում չի կատարում մի որակից մեկ այլ որակի,ապա հանրային աջակցության փոխարեն «սնվում» է տարատեսակ դժգոհություններով, բացասական լիցքերով: Միևնույն ժամանակ՝ հին «որակական վիճակը» սկսում է փտել, վրա է հասնում ճգնաժամերի ցիկլը, ընդ որում՝ դրսից ու ներսից, անընդհատ ընդլայնվելով և համակարգի «ճեղքերը» խորացնելով: Ու այդ ժամանակ արդեն որևէ տեխնիկական միջոց չի կարող այլևս զսպիչ դեր կատարել:

Հ.Գ. 12-րդ դարի ֆրանսիացի փիլիսոփա Աբելյարն ասում էր. «Ոչ թե հավատալ հասկանալու համար, այլ՝ հասկանալ հավատալու համար»: Մինչև մարդիկ չհասկանան, թե ինչու են կատարվում այս կամ այն քայլերն ու գործողությունները, չեն կարող հավատալ, դա նույնիսկ ֆիզիկապես է անհնար: Այնպես որ՝ պետք է, նախ, հասկանան, թե ինչին են հավատում:

 Արման Սահակյան. ֆեյսբուք: