Կրթության ոլորտում շատ լուրջ հարցեր կան. Անահիտ Բախշյան

Այսօր՝ օգոստոսի 31-ին, լրագրողների հետ հանդիպման ժամանակ Երևանի ավագանու «Բարև Երևան» խմբակցության անդամ Անահիտ Բախշյանը խոսեց սեպտեմբերի մեկին ընդառաջ արտագաղթի և դպրոցներում ժողովրդագրության հետևանքի մասին:

Անահիտ Բախշյանն իր հետ բերել էր 2016 թվականի հունիսի 27-ի՝ Կրթության գիտության նախարարի հրամանը, որտեղ ասվում էր, թե 12-րդ դասարանում ինչպես պետք է ուսումնական պլանը կիրառվի: 12-րդ դասարանի առաջին կիսամյակում աշակերտները հանձնում են քննություններ՝ ուսումնական պլանով նախատեսված առարկաներից, բացի ՆԶՊ և այն 3 առարկա, որոնք պետք է ընտրի աշակերտը: 

«Այստեղ շատ լուրջ հարց կա: Սա միայն ավագ դպրոցների համար չէ, եթե ավագ դպրոցում աշակերտը գնացել է որոշակի ուղղությամբ հետագայում մասնագիտանալու համար, այսինքն` հանձնելու 3 քննություն, ապա Հայաստանում ունենք 100 ավագ դպրոց, բայց կան նաև միջնակարգ դպրոցներ, որտեղ 12-րդ դասարանի աշակերտներն առաջին կիսամյակում պետք է հիմնական առարկաները հանձնեն և դրանից հետո բուհ չեն գնալու: Այդ դեպքում, ինչ պետք է անեն նրանք, եթե չեն ուզում ընտրել առարկաներ և իրենք ասում են. «Մի օր շուտ ատեստատ ստանամ՝ գնամ աշխատեմ», նրանց թիվը շատ-շատ է: Ի՞նչ պետք է անեն նրանք, արդյո՞ք ավարտվում է առաջին կիսամյակում 12-ամյակը և նրանք կարող են այդ 3 ավարտական քննությունն էլ հանձնել ու ատեստատ ստանալ»,-ասաց Երևանի ավագանու «Բարև Երևան» խմբակցության անդամ Անահիտ Բախշյանը և հավելեց,- «Հաջորդ տարի մենք ունենք օրենքի ուժի մեջ մտնող պարտադիր միջնակարգ կրթության պահանջը: Այդ դեպքում արդյո՞ք մենք կարողանալու են հիմնական դպրոցը ավարտող շրջանավարտներին` միջին մասնագիտական կամ արհեստագործական ուսումնական հաստատություններում ապահովել կրթությամբ: Մասնավորապես՝ Արագածոտնի մարզում չկա ոչ մի միջին մասնագիտական հաստատություն, լինի դա քոլեջ կամ այլ հաստատություն»

Նրա պնդմամբ` ինքը որպես կրթության փորձագետ՝ հետևում է ԿԳ-ն նախարարի յուրաքանչյուր խոսքին, հրամանին և չի տեսնում մի քայլ, որը գնում է դեպի 12-ամյա պարտադիր միջնակարգ կրթություն: