Արդյո՞ք իրավական տեսանկյունից հնարավոր է Պերմյակովին փոխանակել Հրաչյա Հարությունյանի հետ. փաստաբանների տեսակետները (տեսանյութ)

Այսօր` օգոստոսի 24-ին, լրագրողների հետ հանդիպման ժամանակ Ավետիսյանների իրավահաջորդի ներկայացուցիչ, փաստաբան Լուսինե Սահակյանը, Ավետիսյանների իրավահաջորդի ներկայացուցիչ, փաստաբան Արամազդ Կիվիրյանը և Հելսինկյան Քաղաքացիական Ասամբլեայի Վանաձորի գրասենյակի ղեկավար, Ավետիսյանների իրավահաջորդի ներկայացուցիչ Արթուր Սաքունցը խոսեցին Վալերի Պերմյակովի դատավարության ողջ ընթացքի, դատավճռի, ինչպես նաև վերջինիս ցմահ ազատազրկման մասին:

Operativ.am-ի թղթակցի այն հարցին, թե այդ ինչպես է ստացվում, որ ՌԴ քաղաքացի լինելով, Վալերի Պերմյակովն իր պատիժը կարող է կրել իր երկրում, իսկ ՀՀ քաղաքացի Հրաչյա Հարությունյանը մինչ այսօր գտնվում է ՌԴ-ում և իր պատիժը կրում է այնտեղ, և ինչքանո՞վ է իրատեսական՝ Վալերի Պերմյակովի և Հրաչյա Հարությունյանի փոխանակման հարցը, արդյո՞ք դա իրավական տեսանկյունից հնարավոր է, Լուսինե Սահակյանը պատասխանեց. «Հրաչյա Հարությունյանն իրավունք ունի դիմելու և այդ հարցը պետք է քննարկվի»։

Ասուլիսի մեկ այլ բանախոս Արթուր Սաքունցն ասաց. «Հրաչյա Հարությունյանը հանցագործությունը կատարել է ՌԴ-ի տարածքում, ի սկզբանե, գտնվել է ՌԴ-ի իավապահ մարմինների հսկողության տակ և նրա նկատմամբ դատաքննությունն իրականացվել է ՌԴ-ի դատարանում, դա նորմալ է և չպետք է համեմատել, իսկ Պերմյակովը գտնվում է ՀՀ-ի տարածքում, բայց ռուսական բազայի հսկողության ներքո, որ այնտեղ չպետք է գտնվի»:

Իսկ Արամազդ Կիվիրյանը հավելեց. «Ես համակարծիք եմ պատասխանների հետ և ընդհանուր առմամբ, ի սկզբանե հանձնված չի եղել, և եթե ՀՀ-ի դատարանն է քննում գործը, ապա դա դեռ չի նշանակում, որ տեղի է ունեցել հանձնում և միգուցե այդ ձևով ուզեցել են այդպես անել, որ հասարակության մոտ ստեղծվեր այդ ձևական դիրքորոշումը, որ իբրև «տեսեք Հայաստանի դատարանն է քննում, ուրեմն՝ ամեն ինչ նորմալ է» և դրանից հետո կարծես թե հասարակությունը դրան շատ անդրադարձ չկատարեց»:

Ինչ վերաբերում է փոխանակման հարցին, Արթուր Սաքունցը պատասխանեց. «Անթույլատրեի է մարդկանց առևտուրը: Հրաչյա Հարությունյանի դեպքը բոլորովին այլ դեպք է: Հրաչյա Հարությունյանի դեպքը պետք է դիտարկել արտահանձման շրջանակներում և չպետք է պայմանավորվել Պերմյակովի հետ կապված: Նախ, եթե, նույնիսկ ընդունենք ձեր տրամաբանությունը, ապա դու պետք է ունենաս, որ փոխանակես: Հա՛մ Հրաչյա Հարությունյանն է իրենց մոտ, հա՛մ էլ Պերմյակովը։ Դու ու՞մ հետ ես փոխանակում»:

Առավել մանրամասն դիտեք տեսանյութում: