Ավետիսյանների ընտանիքի սպանությունը լիովին բացահայտված չէ. Արթուր Սաքունց
Այսօր` օգոստոսի 24-ին, լրագրողների հետ հանդիպման ժամանակ Հելսինկյան Քաղաքացիական Ասամբլեայի Վանաձորի գրասենյակի ղեկավար, Ավետիսյանների իրավահաջորդի ներկայացուցիչ Արթուր Սաքունցը խոսեց Վալերի Պերմյակովի դատավարության ողջ ընթացքի, դատավճռի, ինչպես նաև վերջինիս ցմահ ազատազրկման մասին:
Նախքան թեմային անդրադառնալն Արթուր Սաքունցն իր խոսքը սկսեց խորը ցավակցություն հայտնելով հայտնի իրավաբան Միքայել Դանելյանի մահվան կապակցությամբ:
Անցնելով բուն թեմային, նա նշեց, որ Ավետիսյանների սպանության փաստերի հիման վրա, իրավական գնահատականներ ստանալու համար պետք է, բնականաբար, հենվենք ՀՀ օրենքների վրա, սակայն, անխուսափելի են նաև հայ-ռուսական պայմանագրի դրույթները, որ ստորագրվել են ՀՀ-ի և ՌԴ-ի միջև:
«Համադրելով, մենք ունենք հետևյալ կարծիքները.
1. Ավետիսյանների ընտանիքի սպանության փաստով քննությունն իրականացվել է կոպիտ խախտումներով: ՀՀ քննչական մարմինը հնարավորություն չի ունեցել լիարժեք իրականացնելու քննությունը:
2. Ամբողջ քրեական գործի մի մասը տեղափոխվում, հանձնվում է մի գրությամբ, որ «Հանձնում ենք ձեզ»: Մեր քննչական մարմինն էլ ընդունում է և միացվում է ՀՀ ՔԿ-ի կողմից հարուցված քրեական գործին: Հայաստանի քրեական դատավարությամբ սահմանված նորմերից չկա որևիցե նորմ, ըստ որի՝ կարելի է երկու տարբեր երկրների՝ նույն փաստի վերաբերյալ նյութերը միացնել իրար: Այս տեսակետից խիստ կասկածելի է դառնում ամբողջ ապացուցողական բազայի այդ մասը»,-ասաց Հելսինկյան Քաղաքացիական Ասամբլեայի Վանաձորի գրասենյակի ղեկավար, Ավետիսյանների իրավահաջորդի ներկայացուցիչ Արթուր Սաքունցը:
Նրա պնդմամբ՝ այդպես էլ հայտնի չդարձավ, թե Վալերի Պերմյակովն ինչպես հայտնվեց Ավետիսյանների տանը: Հղում կատարելով դատարանի կողմից ճանաչված ապացուցողական բազային, որը ձեռք էր բերվել ռուսական կողմի Քննչական կոմիտեի կողմից, ապա Պերմյակովի փնտրման աշխատանքները տանում են դեպի Ավիտիսյանների տան մոտ, որից հետո արդեն հետքերը կորում են: Նաև հայտնի չէ, թե Պերմյակովը Ավետիսյանների տնից ինչպե՞ս հայտնվեց այդ սահմանամերձ տարածքում, այնտեղ մնացել է մոտ 12-20 ժամ, դա ըստ փաստաբանների հաշվարկի, և բացի Պերմյակովի խոսքից, այլ ապացույց չկա:
«Եթե Պերմյակովն Ավետիսյանների տանը 15 րոպեի ընթացքում առնվազն երկու ծխախոտ է ծխել, ապա այդ 10, 20 ժամվա ընթացքում, երբ պատսպարվել է՝ մեկ հետք գոնե չկա: Ինչո՞ւ եմ սա նշել, որովհետև փաստերը պետք է համակցել մարդու վարքագծի տեսակետից»,- նշեց Արթուր Սաքունցը, իսկ նրան հակադրելով, ասուլիսին ներկա մյուս բանախոս, Ավետիսյանների իրավահաջորդի ներկայացուցիչ, փաստաբան Լուսինե Սահակյանը նշեց, որ կան համապատասխան փաստեր այդ առիթով և դրանք ներկայացվել են:
«Ես գտնում եմ, որ Ավետիսյանների սպանությունը, որպես հանցագործություն, ամբողջովին բացահայտված չէ»,-ասաց Արթուր Սաքունցը: