ՀՀ տեղափոխվում են այն ռուս զինվորները, ովքեր խնդիրներ են ունեցել ՌԴ-ում՝ դասալքության և տարբեր տիպի հանցագործությունների հետ կապված. փաստաբան (տեսանյութ)
Այսօր` օգոստոսի 24-ին, լրագրողների հետ հանդիպման ժամանակ Ավետիսյանների իրավահաջորդի ներկայացուցիչ, փաստաբան Լուսինե Սահակյանը խոսեց Վալերի Պերմյակովի դատավարության ողջ ընթացքի, դատավճռի, ինչպես նաև վերջինիս ցմահ ազատազրկման մասին:
Լուսինե Սահակյանի խոսքով՝ այն փաստը, որ Վալերի Պերմյակովը պետք է մեղավոր ճանաչվեր, դա ակնհայտ էր և ապացույցները բավարար էին, որպեսզի նա մեղավոր ճանաչվի:
«Հետաքննության ընթացքում հնարավորություն ունեցանք հանրությանն էլ ներկայացնել այն բոլոր ապացույցները, որոնցում հիմնավորվում է, որ հանցագործություն կատարող անձը եղել է հենց ինքը՝ Վալերի Պերմյակովը: Ինչ վերաբերում է մեր դժգոհություններին, ապա պետք է ասեմ, որ այո՛, մենք դժգոհ ենք դատական ակտից այնքանով, որ ես կարծում, որ դատավարության հիմնական նպատակը պետք է լիներ այն, որ հետագայում նմանատիպ հանցագործությունները գոնե բացառվեին: Ռուսաստանի Դաշնության զինվորների կողմից բազմաթիվ հանցագործություններ են կատարվել, այդ թվում՝ սպանություններ»,-ասաց Ավետիսյանների իրավահաջորդի ներկայացուցիչ, փաստաբան Լուսինե Սահակյանը:
Նրա պնդմամբ՝ այս գործի ընթացքում պարզ դարձավ նաև այն, թե ինչպես են ընտրվում զինվորները, որոնք տեղափոխվում են Հայաստանի Հանրապետություն:
«Չնայած զինվորականները նշում են, որ իբրև իրենք հատուկ ընտրություն են կատարում զինվորների, բայց արդեն մանրամասն հարցադրումներով պարզ է դառնում, որ ոչ մի ընտրություն իրենք չեն կատարել: Ըստ էության, այն բոլոր զինվորներին, որոնց ընտրված տվել են իրենց, ընդամենը բացառությամբ մի քանի զինվոր, որոնք արտաքինից խնդիրներ են ունեցել, մի քանիսին հանել են շարքից, իսկ մյուսներին տեղափոխել ՀՀ: Մեր դիտարկումները ցույց են տալիս, որ իրականում, Հայաստանը կարծես թե աքսորավայր լինի ռուս զինծառայողների համար, այսինքն՝ ՀՀ տեղափոխվում են այն զինվորականներն, որոնք խնդիրներ են ունեցել ՌԴ-ում (դասալքություններ, տարբեր տիպի հանցագործություններ և այլն), որոնք ամենավատ զինվորականներն են եղել և այդ պատճառով էլ իրենք տեղափոխվում են ՀՀ»,- նշեց իրավաբանը:
Ըստ նրա՝ այս դատավարությունը պետք է հնարավորինս բացառեր հետագա նման փաստերը, և բացի այդ, ինչո՞ւ այս հանցագործությունը հնարավոր եղավ:
«Պերմյակովը, ով ուներ առողջական շատ լուրջ խնդիրներ և 8 անգամ դասալքություն էր կատարել, հոգեբուժական բաժանմունքներում բազմիցս տարբեր բուժումներ էր ստացել և ՌԴ-ում նրան արգելվել էր զենք կրել, բայց չգիտես ինչու, երբ տեղափոխվել էր ՀՀ նրան տրամադրվել էր զենք: Ընդ որում՝ նրան արգելվել էր զենք կրել հենց այն իմաստով, որ նրա համար մարդկային կյանքը որևէ արժեք չունի և այդ պատճառով էլ բժիշկը գտել էր, որ նրան արգելվում է զենք կրելը»,- պնդում է Լուսինե Սահակյանը:
Առավել մանրամասն՝ տեսանյութում: