Իրանի արձագանքը՝ Հռոմի պապի հայաստանյան այցի հետ կապված. պարզաբանում է իրանագետը (տեսանյութ)
Այսօր՝ հունիսի 29-ին, լրագրողների հետ հանդիպման ժամանակ, իրանագետ Վարդան Ոսկանյանը խոսեց Հռոմի պապի այցի հետ կապված Իրանի արձագանքների, տարածաշրջանում հնարավոր զարգացումների մասին:
Վարդան Ոսկանյանի խոսքով՝ կարևոր հանգամանքներից մեկն այն էր, որ Հռոմի պապը փաստացիորեն միևնույն տեքստում օգտագործեց «եղեռն» և «ցեղասպանություն» բառերը՝ որպես հոմանիշներ:
«Հռոմի պապի համատեքստում բացի այն, որ «եղեռն» և «ցեղասպանություն» բառերը կիրառվեցին որպես հոմանիշներ, մեկ անգամ ևս շեշտադրվեց Հռոմի կաթոլիկե եկեղեցու և Վատիկանի դիրքորոշումը՝ մեզ համար ցավոտ այս հարցի կապակցությամբ, որը հարուցեց թուրքական բնականոն, որոշ դեպքերում նույնիսկ վայնասունի հասնող արձագանքների: Շատ հետաքրքիր էր իրանական ԶԼՄ-ների արձագանքը: Ի տարբերություն մեր տարածաշրջանի և արտատարածաշրջանային որոշ երկրների ԶԼՄ-ների՝ նրանք լայնորեն լուսաբանեցին Հռոմի պապի այցը Հայաստանում, առանձնացնելով 2 կարևոր հանգամանք.
1. «Ցեղասպանության» բառի կիրառությունն էր, որի առթիվ իրանական մամուլը հանդես եկավ բազմաթիվ հրապարակումներով:
2. Հայաստանի Հանրապետության նախագահի կողմից հենց Հռոմի պապի այցի շրջանակներում հանդուրժողականության և երկու տարբեր կրոների միջև որպես բարեկամության և լավագույն հարաբերությունների օրինակ նշվեց Իրանի հետ մեր հարաբերությունները: Ինչը բնական է, և այն լայնորել տարածվեց կրկին իրանական ԶԼՄ-ներում և եղան բացառապես դրական արձագանքներ այդ ֆոնին և ինչ-որ առումով Իրանի աչքում էլ մեր երկիրը որոշակի կարգավիճակի փոփոխություն ստացավ»,- ասաց իրանագետ Վարդան Ոսկանյանը:
Նրա պնդմամբ՝ հայ-իրանական հարաբերություններն այս համատեքստում դիտարկելիս առավել ակնհայտ է, որ սա բարի կամքի արտահայտություն էր կամ միգուցե նաև դրական, պատասխան ժեստ:
Մանրամասները՝ տեսանյութում: