Սաակաշվիլին Ավակովի արարքն անբարո և վայրի է անվանել
Օդեսայի նահանգապետ Միխեյիլ Սաակաշվիլին անընդունելի է համարել Ներքին գործերի նախարար Արսեն Ավակովի արձագանքը, որը պաշտպանել է 7-ամյա կիևցի երիտասարդին սպանած ոստիկաններին։ Այդ մասին Վրաստանի նախկին նախագահը գրել է ֆեյսբուքյան իր էջում։
«Բացարձակապես անընդունելի է Ներքին գործերի նախարարի արձագանքը տղայի մահվանը, ով մեքենայի ուղևոր էր, որին հետապնդում էր ոստիկանությունը: Արդարացնել ամենը հարուստների դեմ պայքարով և չգտնել կարեկցանքի խոսքեր` անբարո է և վայրի»,- գրել է Սաակաշվիլին։
Նա հավելել է, որ ուկրաինական նոր ոստիկանության հեղինակության համար շատ կարևոր է միջադեպի լուրջ հետաքննություն անցկացնելը։ Փետրվարի 10-ին Ուկրաինայի ՆԳ նախարար Արսեն Ավակովն արդարացված էր անվանել ոստիկանության գործողությունները Կիևում «BMW» մեքենայի հետապնդման ժամանակ։ «Ես կարծում եմ, որ այստեղ համապատասխան ուժ է կիրառվել»,- հայտարարել է ՆԳ նախարարը:
Կիևի ոստիկանության աշխատակիցները հրազեն են կիրառել փետրվարի 7-ին՝ «BMW»-ի հետապնդման ժամանակ, ինչ արդյունքում էլ զոհվել է 17-ամյա ուղևորը՝ Միխայիլ Մեդվեդևը: Ոստիկանության տվալների համաձայն՝ մեքենան շարժվել է 190 կմ/ժ արագությամբ, և արդյունքում, հայտնվել հանդիպակած ճանապարհին: Ոստիկանները կրակել են բացառապես անիվներին:
Մեքենայի վարորդը՝ Ռոստիսլավ Խրապաչևսկին, իր հերթին, հայտարարել է, որ ոստիկանները շարունակել են կրակել նույնիսկ այն ժամանակ, երբ մեքենան կանգնել է: «Ես ստիպված էի փախչել: Ես վախենում էի մահանալ»,-ասել է վարորդը և հաստատել, որ ղեկին նստել է ոչ սթափ վիճակում:
Դատախազությունը գործի շրջանակներում կուսումնասիրի նաև ոստիկանության գործողութունները: