Ո՞վ է ՀՀ նախագահի նորանշանակ օգնականը
Ինչպես հայտնի է ՀՀ նախագահի կարգադրությամբ ՀՀ նախագահի օգնականի պաշտոնում նշանակվել է Հրայր Ղուկասյանը, ով մինչ այս զբաղեցնում էր ՀՀ նախագահի ռեֆերենտի պաշտոնը: Հրայր Ղուկասյանը փոխարինել է Գեորգի Կուտոյանին: Նա համակարգելու է դատաիրավական ոլորտը: Վերջինս հանդիսանում է իր ոլորտի լավագույն գիտակներից ու մասնագետներից մեկը: Այդ փաստն ամենևին էլ զարմանալի չէ, քանի որ Հրայր Ղուկասյանը հարգված դատավոր Հովհաննես Ղուկասյանի որդին է, որը 90-ականներին Հայաստանի գերագույն դատարանի դատավոր է եղել, իսկ մինչև 2012 թվականը՝ մինչև թոշակի գնալը, եղել է ՀՀ վճռաբեկ դատարանի դատավոր:
Operativ.am-ը ներկայացնում է Հրայր Ղուկասյանի կենսագրականից մի շարք մանրամասներ.
1996 թ-ին գերազանցությամբ ավարտել է ԵՊՀ իրավաբանական ֆակուլտետը։
1999 թ-ին ավարտել է ԵՊՀ ասպիրանտուրան քրեական դատավարություն մասնագիտությամբ։
1999 թ-ին պաշտպանել է թեկնածուական ատենախոսություն «Պաշտպանի դատավարական վիճակը քրեական գործի քննության մինչդատական փուլում» թեմայով և ստացել իրավաբանական գիտությունների թեկնածուի գիտական աստիճան։
1999 թ-ից ՀՀ փաստաբանների պալատի փաստաբան է։ Մասնավոր փաստաբանական պրակտիկան ներառում է քրեական գործերով պաշտպանությունը և ներկայացուցչությունը։
2000 թ-ի օգոստոս-դեկտեմբեր ամիսներին վերապատրաստում է անցել ԱՄՆ Սեթըն Հոլլ համալսարանի իրավունքի դպրոցում (Seton Hall University, School of Law):
2000-2003 թթ. աշխատել է որպես ԵՊՀ իրավաբանական ֆակուլտետի քրեական դատավարության և կրիմինալիստիկայի ամբիոնի ասիստենտ, իսկ 2003 թվականից մինչ օրս՝ նույն ամբիոնի դոցենտ։
2003-2011 թթ. դասավանդել է ԵՊՀ իրավաբանական կլինիկայում:
2005-2009 թթ. եղել է ԵՊՀ իրավագիտության ֆակուլտետի խորհրդի գիտքարտուղար:
2008-2010 թթ. հանդիսացել է «Բաց Հասարակության Հիմնադրամներ-Հայաստան» կազմակերպության խորհրդի անդամ, 2010-2012 թթ. նույն խորհրդի նախագահ:
2011 թ-ից ՀՀ քրեական դատավարության նոր օրենսգրքի նախագիծը մշակող աշխատանքային խմբի ղեկավարն է։
2014 թ-ի փետրվարից ՀՀ Նախագահի ռեֆերենտ: Գիտական ուսումնասիրությունների ոլորտն ընդգրկում է պաշտպանի դատավարական վիճակը քրեական դատավարությունում, դատավարական հարկադրանքի միջոցների կիրառման առանձնահատկությունները, մարդու իրավունքների քրեադատավարական պաշտպանությունը, փաստաբանության և փաստաբանական գործունեության հիմնախնդիրները։
Ամուսնացած է, ունի երկու երեխա։