Պլաստիկ վիրահատությունը՝ Հայաստանում. ի՞նչ դրական և բացասական կողմ ունի այն և ի՞նչ վիրահատություններ են նախընտրում հայերը

Մեր հասարակության շրջանում արդիական են դարձել մարմնի այս կամ այն հատվածի պլաստիկ վիրահատությունները, որոնց ենթարկում է հասարակության լայն հատվածը, քանի որ շատերը բողոքում են իրենց մեծ քթից կամ փոքր շուրթերից: Այս հարցի դրական և բացասական կողմերի, ինչպես նաև հետևանքների մասին Operativ.am-ի թղթակիցը զրուցեց պլաստիկ վիրաբույժ Քնարիկ Հայրապետյանի հետ:

«Մեր երկրում հասարակության շրջանում պլաստիկ վիրահատությունն ավելի շատ սկսեց տարածվել և արդիական դառնալ վերջին 5-6 տարիների ընթացքում: Պլաստիկ վիրահատությունն ունի ինչպես դրական, այնպես էլ բացասական կողմեր: Դրական կողմն այն է, որ շատ դեպքերում, երբ տվյալ մարդը, ով ցանկանում է իրականացնել մարմնի որևէ մասի պլաստիկ վիրահատություն, ակնհայտ տեսնում ես, որ վիրահատությունից հետո ավելի գեղեցիկ է դիտվելու: Բացասական կողմերից մեկն այն է, որ երբ պլաստիկ վիրահատության ես ենթարկում տվյալ անձի մարմնի որևէ մասը, ընթացքում չես կարող հասկանալ վիրահատությունն ինչպես կընդունի օրգանիզմը, սակայն իրականացնում ես վիրահատությունը, քանի որ հիվանդը ցանկացել է անցնել այդ ամենի միջով, եթե վիրահատությունից հետո ինչ-որ խնդիրներ են առաջանում փորձում ենք շտկել»,- զրույցում նշեց պլաստիկ վիրաբույժը:

Operativ.am-ի թղթակիցի այն հարցին, թե մարդիկ հիմնականում մարմնի որ մասն են ցանկանում ենթարկել պլաստիկ վիրահատության, Քնարիկ Հայրապետյանը նշեց, որ այսօր ամենատարածված պլաստիկ վիրահատությունը ռինոպլաստիկան է (քթի պլաստիկ վիրահատությունը):

«Երկրորդ տեղում շուրթերի և այտերի պլաստիկ վիրահատությունն է: Մարմնի մյուս մասերն առայժմ Հայաստանում ավելի քիչ են ենթարկում պլաստիկ վիրահատության, պարզապես պլաստիկ վիրահատությունից առաջ պետք է լավ մտածել գնալ այդ քայլին, թե ոչ, որովհետև լինում են դեպքեր, երբ վիրահատությունից հետո փոշմանում են, որ դիմել են այդ քայլին և որ ամենակարևորն է պլաստիկ վիրահատությունը պետք է նպաստի լավ որակ ստանալուն».- հավելեց Քնարիկ Հայրապետյանը:

Operativ.am-ի թղթակիցը վերը նշված հարցի վերաբերյալ հարցում է իրականացրել մի շարք քաղաքացիների շրջանում պարզելու, թե վերջիններս ինչպես են վերաբերվում պլաստիկ վիրահատություններին, արդյոք երբևէ դիմել են պլաստիկ վիրահատության և արդյոք ընդունելի են համարում այն: 

Քաղաքացիների շրջանում կատարված հարցման արդյունքում պարզ դարձավ, որ քաղաքացիներից շատերը դեմ են պլաստիկ վիրահատություններին, քանի որ վերջիններս մտածում են, որ եթե Աստված մարդուն ստեղծել է այդ տեսքով, հետևաբար, չպետք է փոխել այն: Մասնավորապես, ոմանք նշեցին, որ օրինակ, եթե Աստված մարդուն ստեղծել է մեծ կամ փոքր քթով, ուրեմն այն տվյալ մարդու դեմքին համապատասխան է և չպետք է պլաստիկ վիրահատության միջոցով փոփոխել այն: 

Քաղաքացիների մի մասը դեմ է հատկապես սիլիկոնե վիրահատություններին, որոնք վաղ, թե ուշ հանգեցնելու են որևէ հիվանդության: Սիլիկոնե վիրահատության միջոցով իրականացրած վիրահատություններն արհեստական են, արհեստական է նաև արդյունքում ստացած գեղեցկությունը, որը ժամանակավոր է:

Երիտասարդների շրջանում անցկացված հարցման ժամանակ ոմանք նշեցին, որ եթե պլաստիկ վիրահատությունները տեղին են, ապա ընդունելի են: Նրանց խոսքերով՝ այսօր շատերը ծայրահեղությունների մեջ են ընկնում, թյուր կարծիք ունեն պլաստիկ վիրահատությունների մասին: Վերջիններս նշեցին, որ կան դեպքեր, երբ իրոք պլաստիկ վիրահատությունը ավելի գեղեցիկ է դարձնում մարդուն:

 Հ.Գ. Պլաստիկ վիրահատության կարող է դիմել ցանկացած մարդ` փոխելու մարմնի այս կամ այն հատվածը, ինչպես նաև գեղեցկացնել այն, չմտածելով, որ շատ դեպքերում պլաստիկ վիրահատությունը կարող է հանգեցնել առողջական լուրջ խնդրի, իսկ մենք բոլորս էլ գիտենք, որ առող տեսք ունենալն ինքնին արդեն գեղեցկացնում է մարդում: