Ես կփոխեմ Աբովյանում տիրող մթնոլորտը. Էդվին Թադևոսյան
Կոտայքի մարզի Աբովյան քաղաքում հունիսի 7-ին քաղաքապետի ընտրություններ են, որտեղ` ի թիվս այլոց, առաջադրվել է նաև երիտասարդ գործարար, պետական կառավարման աշխատանքի փորձ ունեցող Էդվին Թադևոսյանը: Mitk.am-ը զրուցել է վերջինիս հետ նախընտրական շրջանի, խոստումների և անելիքների մասին:
— Պարոն Թադևոսյան, ո՞ւմ նախաձեռնությունն է Ձեր թեկնածության առաջադրումը, և Դուք ինչո՞ւ որոշեցիք մասնակցել Աբովյանի քաղաքապետի պաշտոնի համար ընտրապայքարին:
— Բնականաբար, իմ նախաձեռնությունն է, ընկերներս, թիմակիցներս, աբովյանցիները հորդորել, խնդրել են, որ առաջադրվեմ և փոխեմ քաղաքում տիրող մթնոլորտը: Երկար խորհելուց հետո որոշեցի, որ պետք է վերցնեմ այդ պատասխանատվությունն ինձ վրա և առաջադրվեմ Աբովյանի քաղաքապետի թեկնածու:
— Ի՞նչ խնդիրներ կան քաղաքում, և դրանցից ո՞ր մասն եք խոստանում լուծել Աբովյանի քաղաքապետ ընտրվելու դեպքում:
— Աբովյանում խնդիրները շատ են, աբովյանցին ունի հանապազօրյա հացի, գոյատևելու, ապրելու խնդիր: Աբովյանում ովքեր էլ որ կարողացել են որոշակի արդյունքի հասնել` խնդիր ունեն, որ իրենց չխանգարեն: Իսկ Աբովյանում խանգարում են փոքր և միջին բիզնեսին: Աբովյանցին ունի իր կամքը դրսևորելու խնդիր, մինչ այս Աբովյանում չեն եղել այլընտրանքային ընտրություններ, այսպիսի թեկնածուներ: Ամեն բան եղել է կարգադրելով, նշանակելով, որից հոգնել է աբովյանցին:
Իմ առաջադրմամբ` մենք ասում ենք, որ հնարավորություն կա տարիներ ի վեր ստեղծված մթնոլորտը փոխելու: Աբովյանցին հուսահատված էր մինչև իմ առաջադրումը, մտածում էր, որ ամեն բան հին մեթոդներով է լինելու, որ էլի ժողովրդի ձայնը հաշվի չեն առնելու: Մինչդեռ հիմա` մեր բնակչության մոտ մեծ հույս է արթնացել: Նրանք հարգում և գնահատում են միշտ հաղթող ու կայացած մարդկանց: Այդ առումով աբովյանցիները հավատում են մեզ, համոզված եմ, որ հաղթելու ենք, ունենք ուժ, կամք, հնարավորություն` աբովյանցու քվեին տեր կանգնելու:
— Ինչպիսի՞ քարոզարշավ եք իրականացնում, և այն թեկնածուներիդ միջև որքանո՞վ է քաղաքակիրթ:
— Բնականաբար, ես կողմնակից եմ քաղաքակիրթ քարոզարշավի, սակայն չեմ կարող ասել, թե ընդհանուրը որքանո՞վ է քաղաքակիրթ: Հուսանք, որ այդպիսին կլինի: Քարոզարշավը մեկնարկել է, դահլիճային ու բակային հանդիպումներ ենք ունենում աբովյանցիների հետ: Առաջին հանրահավաքը մեր ենթաշտաբերից մեկի տարածքում էր, որտեղ հազարից ավելի աբովյանցիներ էին եկել ունկնդրելու մեզ, լսելու մեր ծրագրերի մասին: Հանդիպումները շարունակվել են քաղաքի հանրակացարանային տարածքում, որտեղ խնդիրները շատ ցավոտ են, որովհետև մինչ այս նրանց որևէ մեկը չի կարևորել, այն կարծես սև խոռոչ է Աբովյան քաղաքում:
— Քարոզարշավի այս փուլում որքա՞ն եք գնահատում Ձեր ընտրվելու հնարավորությունը:
— Շատ բարձր, շատ լավ: Միանշանակ` հաղթելու եմ, մինչ քարոզարշավն էր ինձ համար դա հստակ: Արդեն այս օրերին ավելի տպավորված եմ և գիտակցում եմ, որ աբովյանցիները թոթափել են վախի մթնոլորտն ու առանց կաշկանդվելու գալիս ու մասնակցում են նախընտրական հանդիպումներիս, իրենց աջակցությունն են հայտնում:
— Նրանց թվում ո՞ր սերնդի ներկայացուցիչներն են գերակշռում: Կարելի՞ է ենթադրել, որ երիտասարդ եք, կնշանակի` երիտասարդությունը:
— Բնական է, որ Աբովյանում ինձ ավելի լավ ճանաչում են երիտասարդները, նրանք իրենց հույսը կապում են երիտասարդ, ինքնուրույն, կայացած քաղաքացու, բառիս լայն իմաստով ինքնաառաջադրված քաղաքապետի թեկնածուի հետ: Մեզ հավատում են նաև ավագ և միջին սերնդի մարդիկ, քարոզարշավի ընթացքում առավել լայն զանգված է կենտրոնանում մեր շուրջը, որոնց քվեների արդյունքում էլ կհասնենք հաղթանակի: Այսօր մեզ սատարում են բազմաթիվ մտավորականներ, մարդիկ, ովքեր ապրում և արարում են մեր կողքին, սակայն շատ հաճախ գնահատված չեն եղել: Ինձ սատարում են աբովյանցիները և ոչ թե Երևանից եկած ուժեր, կազմակերպություններ:
— Պարոն Թադևոսյան, մամուլում շատ է քննարկվում այն հարցը, թե Դուք առաջադրվել եք, որպեսզի ընտրապայքարի որոշակի փուլում հանեք Ձեր թեկնածությունն ու միանաք թեկնածուներից մեկին: Հաշվի առնելով այն հանգամանքը, որ Դուք Գագիկ Ծառուկյանի մորաքրոջ թոռն եք, որքանո՞վ են հավաստի այդ տեղեկությունները:
— Միանշանակ` չկա նման բան, Ծառուկյանի հետ մենք ունենք բարեկամական հարաբերություններ, սակայն ոչինչ դրանից ավելի: Աբովյանում ինձ ու իմ ընտանիքին ճանաչողները գիտեն, որ մենք անկախ ենք, որ Էդվին Թադևոսյանին որևէ մեկը չի կարող արհեստականորեն առաջադրել, ես այն մարդը չեմ, ում ընդհանրապես կարող են որևէ բան ստիպել անելու: Եթե ես ուզեի, որ առաջատար կուսակցություններն իմ թեկնածությունը սատարեին, ապա այդպես կլիներ: Հարցն ինձ համար շատ անակնկալ էր, ես վստահեցնում եմ, որ չնայած 28 տարեկան եմ, սակայն կայացած քաղաքացի ու գործարար եմ: Աբովյանցիները միանշանակ գիտեն, որ Էդվին Թադևոսյանը չի կարող միջոց լինել այլոց համար:
— Քաղաքում փակցված Ձեր նախընտրական պաստառներից շատերը պատռված էին, հատուկ վերաբերմո՞ւնք է դա, թե` երեխաների ձեռքի գործը:
— Ճիշտն ասած` չեմ նկատել, թերևս` մեկ – երկու դեպքեր են եղել, կամ` երեխաների խաղի արդյունք է: Ամենալավ ցանկության դեպքում էլ, իմ մրցակիցները ռիսկ չեն անի պատռել պաստառներս: Եթե մեկ վայրկյան անգամ կասկածեմ, ապա ես շատ բան ունեմ պատռելու, իրենց դեմքերը կպատռեմ: Իրենք այդ մասին շատ լավ գիտեն: Ուժեղ մարդը չի կասկածում, որ ինչ որ մեկը կարող է նման բան անել, իրենք էլ են հասկանում, որ չի կարելի կրակի հետ խաղալ:
— Քարոզարշավային ինչպիսի՞ քաղաքականություն եք որդեգրել, թաղեթա՞ղ եք շրջելու, թե` դահլիճային հանդիպումներ ունենալու, գուցե ընտրապայքարը եզրափակելու եք համերգ — հրավառությա՞մբ:
— Համերգ – հրավառություն նախընտրական շրջանում և ավարտին չի լինելու, համերգ կկազմակերպենք ընտրություններում հաղթելուց հետո: Երբ աբովյանցին կտոնի իր հաղթանակը, կըմբռնեն, որ համերգներով ու հրավառություններով պետք չէ իրենց խաբել: Աբովյանցին այս անգամ հնարավորություն ունի իր կամքն արտահայտելու: Քարոզարշավային հատուկ քաղաքականություն չեմ որդեգրել, երբեմն շրջում եմ տարածքային ենթաշտաբերով ու զրուցում այնտեղ հավաքված կամ հերթագրված քաղաքացիների հետ: Որտեղ կա խնդիր` պարտադիր հանդիպում եմ, հասանելի եմ և այդպիսին եմ լինելու բոլորի համար:
-Քաղաքացիները հիմնականում ի՞նչ հարցերով են դիմում թեկնածուին` անձնական – սոցիալական, թե` քաղաքի հիմնախնդիրների հետ կապված:
— Քաղաքացիների հիմնական խնդիրը կապված է քաղաքի բարեկարգման, բակային ու շենքային խնդիրները լուծելու հետ, ինչպես նաև` սոցիալական, աշխատատեղերի խնդիրների: Դա, իհարկե, քաղաքապետի պարտականությունը չէ, սակայն երբ դու դառնում ես քաղաքապետ, պատասխանատվություն ես ստանձնում, պիտի կարողանաս վստահություն ներշնչել այնքան, որ գործարարները ներդրումներ կատարեն քաղաքում և աշխատատեղեր ստեղծեն: Պետք է խաղահրապարակներ կառուցել քաղաքում: Աղբահանության խնդիրը պետք է իսպառ վերացվի: Ասֆալտապատումն ընտրությունից ընտրություն չարվի և` անորակ: Երկրորդական փողոցներում, բակերում լուսավորություն չկա, դա պետք է հիմնավորապես լուծվի` ժամանակակից էներգախնայող լամպերի միջոցով: Բարձրահարկ շենքերի վերելակների ու տանիքների խնդիրները պետք է լուծվեն և հիմնովին: Աբովյանում պետք է մշակութային կյանքն ակտիվացվի, աբովյանցիները կարողանան թատրոն ու կինոթատրոն այցելել, մշակութային նոր կենտորններ պետք է հիմնվեն քաղաքում, ինչպես նաև` ժամանցի կենտրոններ: Դրանից առաջ և հետո, ամենակարևորը, աշխատատեղերի խնդիրը պետք է լուծվի աբովյանցիների համար: Ես` լինելով գործարար, լավ պատկերացնում եմ, թե ինչպես, քայլերի որ հերթականությամբ կարելի է հասնել այդ ամենին:
— Քարոզարշավում ունե՞ք կարգախոս, որով առաջնորդվում եք:
— Այո. «Կա հնարավորություն` փոխելու …»:
— Ի՞նչը փոխելու:
— Աբովյանում ստեղծված մթնոլորտը, իրավիճակը` սոցիալականից սկսած մինչև արդարություն: Իմ պատկերացրած քաղաքում իմ պատկերացրած քաղաքապետը պետք է հասանելի լինի բոլորին: Աբովյանցին էլ պետք է պահանջատեր լինի քաղաքապետից ու քաղաքապետարանից: Աբովյանցին քաղաքապետի մոտ չպետք է վիզ ծռի ու խնդրի որևէ բան անել, այլ պիտի ընտրի ու պահանջի:
Ես ընդամենը 28 տարեկան եմ և հասել եմ բազմաթիվ հաջողությունների, պետական աշխատանքի փորձ ունեմ` Վերահսկիչ պալատում: Այսօր Աբովյանում ամենալավ մեքենաները ես եմ վարում, ամենալավ տունը ես եմ կառուցում: Ես որևէ բանի կարիք չունեմ: Ես ուզում եմ քաղաքապետ դառանալ ընդամենը չորս տարով, որի ընթացքում հո չեմ կեղտոտվելո՞ւ: Չէ՞ որ կյանքիս 70 – 80 տոկոսը դեռ առջևում է, ապրելու եմ մեր քաղաքում, ուստի` այնպես պետք է աշխատեմ, որ գլխիկոր ման չգամ, մարդիկ գնահատեն:
— Եվ վերջում. Ձեր կոչը, խոսքն աբովյանցիներին, գուցե հատկապես նրանց, ովքեր տատանվում են, թե թեկնածուներիդ միջև ո՞ւմ ընտրեն:
— Աբովյանցին թող այս անգամ ընտրի այն մարդուն, ով հնարավորություն ունի փոխելու քաղաքում տիրող մթնոլորտը: Աբովյանցին հոգնել է դրանից: Թող ընտրի կարող ուժին, ում մեջ տեսնում է հաղթանակը: Ես այս պահից համարում եմ, որ ընտրված քաղաքապետ եմ, որովհետև աբովյանցին անկաշկանդ է այսօր, և համոզված եմ` ճիշտ ընտրություն է կատարելու: Ամեն բան դեռ առջևում է …
Ռեպորտաժ քարոզարշավային հանդիպումից.
Աբովյանի քաղաքապետի թեկնածու Էդվին Թադևոսյանը շրջայց կատարեց Աբովյանում: Զրուցեց բնակիչների հետ իմանալու համար նրանց բողոքների և առաջարկների մասին, որոնք իր՝ քաղաքապետ դառնալու դեպքում, առաջնային տեղ կզբաղեցնեն քաղաքի համար նախատեսված ծրագրերում:
Քաղաքացիներից մեկը նշեց, որ ով ժողովրդին ավելի լավ կնայի՝ իրենք էլ հենց նրան կընտրեն, քանի որ, եթե նախկինում մի կտոր հաց ունեին, ապա այժմ՝ դա էլ չունեն: Ի պատասխան դրան՝ Աբովյան քաղաքի քաղաքապետի թեկնածու Էդվին Թադևոսյանն ասաց. «Այսօր, ես պատասխանատվությունն ամբողջությամբ վերցնում եմ ինձ վրա: Ձեզնից ընդամենը հարկավոր է մասնակցել ընտրություններին և ընտրել ձեր խղճի թելադրանքով: Երկիրը լքելով հարց չի լուծվի, քանի որ Ռուսաստանում էլ ամեն բան լավ չէ: Հայրենիքից լավ տեղ չկա: Ճիշտ քաղաքապետի ընտրելով՝ մարդիկ վստահություն ձեռք կբերեն և նոր ներդրումներ կիրականացվեմ: Իմ նպատակն է, որպեսզի թեթև արդյունաբերությունը զարգանա: Քաղաքապետը պետք է լինի ուժեղ, հասանելի և ինքնուրույն մարդ, որպեսզի ինքնառաջադրվի, այլ ոչ թե իրեն առաջադրեն: Եթե մենք չհամախմբվենք, ապա ոչ մի դրական փոփոխության չենք հասնի, այդ իսկ պատճառով, հարկավոր է, որպեսզի այս 10 օրվա ընթացքում ծանոթանաք բոլոր թեկնածուների անցած ուղղու, սատարողների, գործելաոճի հետ, և հասկանաք, թե արդյոք նրանք ազնիվ են գործում և այդ ժամանակ ընտրությունների օրը կատարեք ճիշտ որոշում»: