Քաղաքապետը պետք է ինքն առաջադրվի, այլ ոչ թե իրեն առաջադրեն. Էդվին Թադևոսյան
Ինչպես հայտնի է, երեկ մեկնարկել էր Աբովյան քաղաքի քաղաքապետի արտահերթ ընտրությունների թեկնածուների նախընտրական քարոզարշավը: Իր մեկնարկային քարոզարշավը սկսել էր ինքնաառաջադրված Էդվին Աշոտի Թադևոսյանը:
Այսօր քաղաքապետի թեկնածու Էդվին Թադևոսյանը շրջայց կատարեց Աբովյանում: Զրուցեց բնակիչների հետ իմանալու համար նրանց բողոքների և առաջարկների մասին, որոնք իր՝ քաղաքապետ դառնալու դեպքում, առաջնային տեղ կզբաղեցնեն քաղաքի համար նախատեսված ծրագրերում:
Քաղաքացիներից մեկը նշեց, որ ով ժողովրդին ավելի լավ կնայի՝ իրենք էլ հենց նրան կընտրեն, քանի որ, եթե նախկինում մի կտոր հաց ունեին, ապա այժմ՝ դա էլ չունեն:
«Ընդամենը 10 %-ն է ապրում, իսկ 90 %-ը՝ գոյատևում և տառապում»,-ասաց քաղաքացիներից մեկը:
Ի պատասխան դրան՝ Աբովյան քաղաքի քաղաքապետի թեկնածու Էդվին Թադևոսյանն ասաց. «Այսօր, ես պատասխանատվությունն ամբողջությամբ վերցնում եմ ինձ վրա: Ձեզնից ընդամենը հարկավոր է մասնակցել ընտրություններին և ընտրել ձեր խղճի թելադրանքով: Երկիրը լքելով հարց չի լուծվի, քանի որ Ռուսաստանում էլ ամեն բան լավ չէ: Հայրենիքից լավ տեղ չկա: Ճիշտ քաղաքապետի ընտրելով՝ մարդիկ վստահություն ձեռք կբերեն և նոր ներդրումներ կիրականացվեմ: Իմ նպատակն է, որպեսզի թեթև արդյունաբերությունը զարգանա: Քաղաքապետը պետք է լինի ուժեղ, հասանելի և ինքնուրույն մարդ, որպեսզի ինքնառաջադրվի, այլ ոչ թե իրեն առաջադրեն: Եթե մենք չհամախմբվենք, ապա ոչ մի դրական փոփոխության չենք հասնի, այդ իսկ պատճառով, հարկավոր է, որպեսզի այս 10 օրվա ընթացքում ծանոթանաք բոլոր թեկնածուների անցած ուղղու, սատարողների, գործելաոճի հետ, և հասկանաք, թե արդյոք նրանք ազնիվ են գործում և այդ ժամանակ ընտրությունների օրը կատարեք ճիշտ որոշում»:
Նշենք, որ Աբովյան քաղաքի քաղաքապետի թեկնածու Էդվին Թադևոսյանն այսօր՝ ժամը 17:00-ին, պետք է հանդիպում ունենա Աբովյանի հանրակացարանների բնակիչների հետ, այնուհետև, ժամը 18:00-ին՝ Կինոյի տան հարևանությամբ, իր խոսքով կդիմի աբովյանցիներին: