Աբովյանցիները քաղաքապետի թեկնածու Էդվին Թադևոսյանի կողքին են (լուսանկարներ)
Այսօր մեկնարկեց Աբովյան քաղաքի քաղաքապետի արտահերթ ընտրությունների թեկնածուների նախընտրական քարոզարշավը: Իր մեկնարկային քարոզարշավը սկսեց ինքնաառաջադրված Էդվին Աշոտի Թադևոսյանը: Քարոզարշավը մեկնարկեց Էդվին Թադևոսյանի՝ առաջին շտաբի տարածքում: Քաղապետի թեկնածու Էդվին Թադևոսյանի շտաբի պետ Ժորա Միսակյանը դիմելով հանրությանը՝ ներկայացրեց քաղաքապետի թեկնածուին:
«Էդվին Աշոտի Թադևոսյանը ծնվել է 1987թ-ի հունվարի 6-ին Աբովյան քաղաքում: Սովորել է N 1 դպրոցում, այնուհետև սովորել և ավարտել է ԵՊՀ Միջազգային հարաբերությունների ֆակուլտետը, որից հետո ծառայության է անցել ՀՀ ԶՈւ-ում: Ավարտելով ծառայությունը՝ Էդվին Թադևոսյանն ուսանել է ԵՊՀ տնտեսագիտության ֆակուլտետում՝ ստանալով մագիստրոսի կոչում: Էդվին Թադևոսյանն աշխատել է ՀՀ վերահսկիչ պալատում, որտեղ զբաղեցրել է մի շարք պատասխանատու պաշտոններ: Վերջինս հանդիսանում է հաջողակ գործարար և 2012 թ-ից հիմնել է մի շարք ընկերություններ, որոնք աշխատատեղեր են ապահովել»,-նման ելույթով հանդես եկավ Էդվին Թադևոսյանի շտաբի պետ Ժորա Միսակյանը:
Այնուհետև ելույթ ունեցավ քաղաքապետի թեկնածու Էդվին Թադևոսյանը, ով իր խոսքն ուղղեց իր աջակից աբովյանցիներին:
«Սիրելի աբովյանցիներ շնորհակալություն, որ այսօր այստեղ եք: Շատերն ինձ հարց են տալիս, թե ինչու Էդվին Թադևոսյանն առաջադրվեց: Ես ուզում եմ, որ աբովյանցին հպարտ լինի իր քաղաքում և Աբովյանի քաղաքապետը հասանելի լինի աբովյանցիների համար: Երբեմնի աբովյանցու հպարտ կեցվածքը պետք է վերականգնենք: Մենք ունեինք հզոր արդյունաբերական քաղաք, բայց այսօր չունենք այդ գործարանները և աշխատատեղերը: Այսօր աբովյանցին ունի աշխատատեղերի, հարգված և ընդունված լինելու խնդիր: Իմ առաջադրումը մի նպատակ ունի՝ համախմբել բոլորին, որպեսզի Աբովյանում չլինի «սրանք- նրանք», պետք է լինեն հավասար աբովյանցիներ: Աբովյանը նախկինում եղել է արդյունաբերական հզոր քաղաք: Բայց այժմ ի՞նչ ենք տեսնում, ինչի՞ է վերածվել մեր քաղաքը: Մենք ունենք հստակ ծրագիր՝ աշխատելու ենք բոլորով, միասին, ձեր հետ: Տարեկան ծրագիրը քննարկելու ենք աբովյանցիների հետ: Հանրահավաք ենք անելու, ընդունելու ենք առաջարկներ, ինչպես նաև տարեկան կատարված ծրագիրը ներկայացնելու ենք աբովյանցիների հաստատմանը: Երբ խոսվում է ասֆալտապատման վերաբերյալ, այդ ասֆալտապատումն իրականացվում է աբովյանցի հարկատուների միջոցով: Ես անկուսակցական եմ և բոլոր ջանքերս ներդնելու եմ աբովյանցիների խնդիրների լուծմանը»,-նման խոսքով հանդես եկավ Աբովյանի քաղաքապետի թեկնածու Էդվին Թադևոսյանը: