Բյուջեն ինքներդ եք հաստատել. Հրայր Թովմասյանը՝ պատգամավորին

ԱԺ-ում շարունակվում են քննարկումները 2014 թվականի պետական բյուջեի կատարողականի քննարկման վերաբերյալ: Ընդհանուր ամփոփիչ զեկույցով հանդես եկավ ԱԺ աշխատակազմի ղեկավար Հրայր Թովմասյանը, ով ներկայացրեց, թե 2014թ-ին ՀՀ ԱԺ-ն ինչ գործունեություն է ծավալել, ԱԺ նախագահի կողմից կատարված արգևատրումները, կազմակերպված ֆուրշետները, ԱԺ բակի նորոգումը և մի շարք այլ զեկույցներ: Այնուհետև ԱԺ աշխատակազմի ղեկավարին իր հարցն ուղղեց ՀՀ ԱԺ անկախ պատգամավոր Էդմոն Մարությանը: Նա հետաքրքրվեց, թե օրենսդիրին շինարարական ծախսերի համար հատկացված 87 միլիոն դրամն ինչի վրա է ծախսվել: 

Թովմասյանը նշեց, որ վերանորոգման աշխատանքների համար նախատեսված գումարից դեռևս 18-20 միլիոն դրամ գումար կա և այն կծախսվի սանհանգույցների վերանորոգման, ինչպես նաև այլ շինարարական աշխատանքների համար:Իսկ ծախսված գումարի մասով Թովմասյանը նկատեց, որ վերանորոգվել են ԱԺ շենքի դիմացի հատվածն ամբողջությամբ, ինչպես նաև մուտքի աստիճանների հատվածը:

Պատգամավորը Թովմասյանից հետաքրքրվեց, թե նման սուղ տնտեսական պայմաններում ինչպես է հաջողվել ԱԺ նախագահի և խմբակցությունների ղեկավարների համար նոր «Ջիպ» մակնիշի մեքենաներ գնել. «Խոսքը Ազգային ժողովի նախագահին ուղեկցող երկու «Ջիպ» մակնիշի մեքենաների մասին է, և որքան գիտեմ, խմբակցությունների ղեկավարների համար ևս նոր մեքենաներ են գնվել»,- ասաց Էդմոն Մարուքյանը:

Հրայր Թովմասյանը նախ տեղեկացրեց, որ նախորդ տարվա բյուջեով գնվել է ընդամենը մեկ ավտոմեքենա, իսկ ինչ վերաբերում է ԱԺ նախագահին և խմբակցությունների ղեկավարների մեքենաներին Թովմասյանը նկատեց, որ այս պահին ինքը զեկուցում է 2014 թվականի պետական բյուջեի կատարողականը, իսկ նախորդ տավա բյուջեով նախատեսված է եղել գնել ընդամենը մեկ ավտոմեքենա. «Որպես պատգամավոր` Դուք եք հաստատել այս տարվա բյուջեն, և բյուջեում չնախատեսված ծախսեր չի կարող լինել: Հստակ սահմանված է, թե որ աշխատակիցներին է հասնում ծառայողական մեքենաներ: Այո, խմբակցության ղեկավարները ստացել են նոր մեքենաներ»,- ասաց Թովմասյանը:

Պատգամավոր Էդմոն Մարուքյանն էլ նկատեց, որ բյուջեի քննարկման ժամանակ իրենք տարբեր նախաձեռնությունների համար գումար են խնդրում, սակայն կառավարությունը մերժում է` ասելով, որ գումար չկա, բայց ամեն տարի ճոխություններ են թույլ տալիս և նոր մեքենաներ են գնում: