Վերջին դաս՝ Պուշկինի անվան թիվ 8 հիմնական դպրոցում (տեսանյութ և լուսանկարներ)

Մայիսի 22-ին հանրապետության բոլոր դպրոցներում տոն է:  Այս օրը հիշարժան է մի սերնդի համար, որը լքում է տաքուկ, ապահով, միշտ ներող, սիրող, հանդիմանող, կրթող, կերտող, իրեն 9 կամ 12 տարի խնամքով պահած տունը՝ դպրոցը: Երևանի Ա.Պուշկինի անվան թիվ 8 հիմնական դպրոցում նույնպես տոնական տրամադրություն էր:

Աշակերտները,  թեև երկար ժամանակ չեն սովորել միասին, սակայն  հասցրել են կապվել միմյանց հետ ու այսօր արդեն հուզված ու արցունքով են պատրաստվում բաժանվել իրենց ընկերներից: Operativ.am-ի թղթակցի հետ զրույցում  աշակերտները նշեցին իրենց նախընտրած մասնագիտությունները, փաստաբան, ճարտարապետ, բժիշկ, գործարար և այլն, ինչն արդեն հուսադրում է, որ ապագան ապահով ձեռքերում է: Հեռուստահաղորդավար, ռեժիսոր, Պուշկինի անվան դպրոցի լրատվական բաժնի ղեկավար Կարեն Քոչարյանը վստահ, է որ իր դպրոցի սաները  բարձր են պահելու այն դպրոցի պատիվը, որն իր խոսքով՝ միշտ տարբերվել է մյուսներից:

«Որպես հավատարիմ շրջանավարտ, որպես պուշկինցի, երբ մտնում եմ այս դպրոց, բոլոր դժվարություններն ու խնդիրները մոռանում եմ: Յուրաքանչյուրը, ով մտնում է իր դպրոց, վերադառնում է իր մանկություն, իսկ մանկությունն իրոք հրաշք է: Ես ցանկանում եմ այսօրվա շրջանավարտներին, որպեսզի նրանք պահեն ու պահպանեն այն բոլոր գիտելիքներն ու ավանդույթները, որ տրվել են նրանց այս դպրոցում և հետագայում փոխանցեն իրենց երեխաներին: Ողջունում և շնորհավորում եմ բոլորին, կանաչ ճանապարհ եմ մաղթում»,-ասաց նա:

Ավարտական դասարաններին իր խոսքն ու շնորհավորանքը հղեց նաև դպրոցի տնօրենը:

«Մեզ համար իհարկե տոն է, բայց մենք միաժամանակ տխուր ենք, քանի որ ճանապարհում ենք մեր սիրելի երեխաներին: Բոլորին բարին եմ մաղթում: Վստահ եմ, որ դեռ լսելու ենք  նրանց մասին և հպարտանալու»,-ասաց դպրոցի տնօրեն Նատալիա Ստեփանյանը:

Operativ.am-ը   վերջին դասի առթիվ շնորհավորում է աշակերտներին: