«Արտադրվում է Հայաստանում». Գործնական քայլ նոր շուկաների փնտրտուքում
Այսօր ՀՀ Կառավարության և Հայաստանի զարգացման հիմնադրամի ջանքերով կազմակերպված «Արտադրված է Հայաստանում» (“Made in Armenia”) խորագրով ցուցահանդեսի եզրափակիչ օրն է:
Ցուցահանդեսին ներկայացվել են արդյունաբերության, զբոսաշրջության և տեղեկատվական տեխնոլոգիաների ոլորտների հայրենական արտադրության ապրանքներ արտադրող ու ծառայություններ մատուցող շուրջ 300 ընկերություններ:
Ցուցահանդեսը նպատակ ունի ցուցադրել ՀՀ արդյունաբերության առկա ներուժը, նպաստել նոր շուկաների բացահայտմանն ու գործարար կապերի հաստատմանը, հարթակ ստեղծել հայկական արտադրողների և արտասահմանյան ներդրողների ու դիստրիբյուտորների միջև արդյունավետ երկխոսության համար:
Ցուցահանդեսին մասնակցելու նպատակով արտասահմանից հրավիրված են պետական պաշտոնյաներ և մասնավոր հատվածի ներկայացուցիչներ, դիտրիբյուտորներ, պոտենցիալ գնորդներ և ներդրողներ` հնարավորություն ստեղծելով տեղում ծանոթանալու հայկական ընկերությունների արտադրանքին, ծառայություններին և դրանց արտադրական ներուժին:
Ցուցահանդեսին մասնակցեցին ՀՀ Նախագահը, վարչապետը, էկոնոմիկայի նախարարը, ինչպես նաև պետական աջակցություն ունեցող մի շարք կազմակերպություներ: Նրանք շրջեցին տաղավարներով, զրուցեցին արտադրողների հետ, որոնք հիմնականում բարձրաձայնում էին շուկայի, հումքի և հաստոցների ներկրման բարձր մաքսատուրքերի խնդիրը:
Հայաստանյան տնտեսության հակաճգնաժամային միջոցառումների, շրջանակում, երբ բազմիցս խոսվում է արտադրության և արտահանման խթանման, շուկաների դիվերսիֆիկացման մասին, այս ցուցահանդեսը կարելի է գնահատել, որպես գործնական քայլ ուղված նոր շուկաների բացահայտմանը, գործարար կապերի հաստատմանը, ներդրումային ծրագրերի իրականացմանը:
Այսօր արտադրողները դժվարանում են ինքնուրույն նոր շուկաներ մտնել, այդ շուկաների մշակույթը ձեռք բերել, պատշաճ դիրք գրավել, սերտիֆիկացման գործընթացն հաղթահարել և ունեն պետական աջակցության կարիք: Այս խնդիրների լուծմանն ու աջակցմանն համատեքստում է ցուցահանդեսի կազմակերպումը:
Հայկ Համբարձումյան.ֆեյսբուք