Փաստաբանը` «Դրո»-ի հուղարկավորության արարողությունից հետո կատարված խուզարկության մասին (լուսանկարներ)

Մարտի 4-ին, ժամը 13։59-ին ոստիկանությունն ահազանգ էր ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել էին 1 զոհի և 2 վիրավորի, վիրավորներին տեղափոխել են «Էրեբունի» ԲԿ, որոնք էլ ճանապարհին մահացել էին։ Կրակոցների հետևանքով մահացած երեք անձանցից մեկը Լևոն Ղազարյանն էր, ով հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադևոսյանն էր, ով հայտնի է «Դրո» անունով, երրորդը՝ Մեսրոպ Նազարյանցը, մահացել էր տեղում:

Սպանությունից հետո Դրաստամատ Թադևոսյանի՝ «Դրո»-ի հուղարկավորության արարողությունից հետո, ոստիկանության աշխատակիցները բնակարանի խուզարկության թույլտվության որոշմամբ հայտնվել էին Դրոյի մոր, ինչպես նաև նրա եղբոր` Սեպուհ Թադևոսյանի (նա Հունաստանից էր վերադարձել եղբորը հրաժեշտ տալու համար) բնակարանում: Այս մասին Operativ.am-ի թղթակցի հետ զրույցում հայտնեց Դրաստամատ Թադևոսյանի մայրիկի՝ Սիրուն Նաջարյանի ներկայացուցիչը՝ ՀՀ փաստաբանների պալատի փաստաբան Արմեն Ֆերոյանը:

«Տան խուզարկությունն իրականացվել է մայիսի 28-ին` հուղարկավորությունից մի քանի օր անց: Խուզարկման ժամանակ նրանց տունը բազմամարդ էր, ովքեր եկել էին իրենց ցավակցությունը հայտնեին այդ ընտանիքին: Ընտանիքի անդամները չգիտեին, թե ինչ անեին, իրենց վիշտը սգային, թե ոստիկանների խուզարկությունների ընթացքն ապահովեին»,-հայտնեց պրն. Ֆերոյանը:

Թղթակցի այն հարցին, թե ինչ հիմքով էր իրականացվել խուզարկումը, Արմեն Ֆերոյանն ասաց. «Դատարանում ներկայացվել էր օպերատիվ տեղեկություն, թե իբրև Սեպուհ Թադևոսյանը կասկածվում է ոմն Ն. Մ.-ի բնակարանից 2 մլն ՀՀ դրամ արժողության ոսկյա զարդերի հափշտակության մեջ: Այդ հիմքով էլ նրանք ցանկացել էին խուզարկում իրականացրել:  Դատարանի որոշման մեջ գրված էր. «Թույլատրել Սեպուհ Թադևոսյանին պատկանող հասցեում կատարել խուզարկություն»: Մենք ոստիկանների հայտնեցինք, որ այս բնակարանը Սեպուհ Թադևոսյանին չի պատկանում, այլ, այն պատկանում է նրա մորը: Չնայած նրան, որ դա Սեպուհի բնակարանը չէր, ընտանիքի անդամները թույլ տվեցին իրականացրել այդ խուզարկումը»,-հայտնեց փաստաբան Արմեն Ֆերոյանը:

Հիշեցնենք, որ այս սպանության առնչությամբ Քննչական կոմիտեում քրեական գործ է հարուցվել ՔՕ 104 հոդվածի 2-րդ մասին 1-ին կետով և 235 հոդվածի 1-ին մասով: Ոստիկանությունը մարտի 12-ին հետախուզում էր հայտարարել ՀՀ քրեական օրենսգրքի 104 և 235 հոդվածների հատկանիշներով մեղադրվող 1986 թ. ծնված Սարգիս Գրիգորյանի (մականունը՝ Ծգլ), 1984 թ. ծնված Սարգիս Հախանումյանի (մականունը՝ Տլե) եւ 1984 թ. ծնված Վահան Հակոբյանի (մականունը՝ Գաստիկ) նկատմամբ: Նրանք 11 օր հետախուզման մեջ գտնվելուց հետո ինքնակամ ներկայացել էին Ազգային անվտանգության ծառայություն, այժմ կալանավորված են: Իսկ դրանից առաջ էլ կալանավորվել էին ևս 5 հոգի: