Դերասանը տանը կլինի

«Ժողովուրդ» թերթը գրում է. «Վարդան Պետրոսյանն այն մարդը չէր, ում դատական քննության ողջ ընթացքում պետք է այսքան ստորացնեին, նվաստացնեին: Բայց տեսեք՝ նա ինչ ազնվորեն ու գլուխը բարձր կերպով դուրս եկավ այս ամեն ինչի միջից: Երեկ դերասան Վարդան Պետրոսյանի գործով դատավճռի հրապարակումից հետո այսպես արտահայտվեց նրա քույրը՝ Աշխեն Պետրոսյանը: Դերասանի քույրը լիահույս է, որ Վարդան Պետրոսյանը շուտով ազատության մեջ կլինի, քանի որ նրա հանդիսատեսն իրեն է սպասում:

«1 տարի 3 ամիս ես լռել եմ, բայց սիրտս այլևս չի դիմանում այն ստերին, որ տուժող կողմն է հայտարարում: Մենք նրանց հետ հանդպիպել ենք, ամեն ինչ նորմալ անցել է: Սակայն յուրաքանչյուր հանդիպումից հետո նորից նույն ագրեսիան են դրսևորել»,-շարունակեց դերասանի քույրը:
Նիստերի դահլիճը, ինչպես այս գործով մյուս բոլոր նիստերին, երեկ ևս բազմամարդ էր: Ներկա էին թե՛ մշակույթի գործիչներ, թե՛ շարքային քաղաքացիներ:

Բոլորն էլ եկել էին իրենց սիրելի դերասանի կողքին լինելու: Դերասանին իրենց սրտացավությունն էին եկել հայտնելու նաև ՊՆ ռազմական ոստիկանության նախկին պետ Արամ Տեր-Սահակյանը, դերասան Սարգիս Միքայելյանը, «Ժառանգություն» կուսակցության նախագահ Րաֆֆի Հովհաննիսյանը: Վերջինս նիստերի դահլիճ մտնելուն պես մոտեցավ Վարդան Պետրոսյանին և, չնայած դատական կարգադրիչների կողմից արգելքին, Րաֆֆի Հովհաննիսյանը հանեց իր եռագույնով վզարկուն (շարֆ), համբուրեց այն և տվեց Վարդան Պետրոսյանին:

Եվ հրապարակվեց վճիռը՝ հանուն Հայաստանի Հանրապետության: Թեև մեղադրող դատախազը նախապես դատարանից պահանջել էր Վարդան Պետրոսյանի նկատմամբ կիրառել 6.5 տարվա ազատազրկում, սակայն Վարդան Պետրոսյանը մեղավոր ճանաչվեց 2013թ. հոկտեմբերի 20-ին Երևան-Եղվարդ ավտոճանապարհին տեղի ունեցած ավտովթարի համար և դատապարտվեց 5 տարվա ազատազրկման:

Դերասանը մեղադրվում է ճանապարհային երթևեկության կամ տրանսպորտային միջոցների շահագործման կանոնները խախտելու մեջ, որն անզգուշությամբ առաջացրել է երկու կամ ավելի մարդու մահ: Հիշեցնենք` վթարի հետևանքով զոհվել էին հորեղբորորդիներ Էդգար և Էդուարդ Հակոբյանները»:

Առավել մանրամասն՝ «Ժողովուրդ» թերթի այսօրվա համարում: