Պատերազմի վետերանների՝ քաղաքականությանը մասնակից լինելու բանաձևի բացակայությունը
«Առավոտ» թերթը գրում է. «Ներկայացնում ենք թերթի խմբագրականը հատվածաբար.
«Մեր պետությունը՝ իշխանությունը, քաղաքական ուժերը, հասարակությունը 20 տարվա ընթացքում չեն կարողացել մշակել պատերազմի վետերանների՝ քաղաքականությանը մասնակցելու համոզիչ բանաձև: Մի կողճից՝ նախկինում պատերազմին մասնակցած մարդը, ինչպես և Հայաստանի ցանկացած այլ քաղաքացի, իրավունք ունի զբաղվելու քաղաքականությամբ, իր տեսակետը հայտնելու այս կամ այն քաղաքական խնդրի շուրջ:
Թե որքանով իր կարծիքը կլինի հեղինակավոր, որքանով է դա պայմանավորված իր «կռված» լինելու փաստով՝ դա չափազանց անհատական խնդիր է: Կան ազնվորեն կռվածներ, որոնց քաղաքական հեղինակությունն այսօր հավասար է զրոյի, կան չկռվածներ, որոնք քաղաքացիների այս կամ այն շրջանակներում հարգանք են վայելում:
Երեկ պատգամավոր-գեներալ Մանվել Գրիգորյանը նախ ասաց, որ երկրապահներին քաղաքականության մեջ ներքաշելը վատ է, իսկ հետո՝ արդարացնելով այն փաստը, որ ինքը՝ երկրապահների ղեկավարը լինելով, միաժամանակ ԱԺ պատգամավոր է և ՀՀԿ խմբակցության անդամ, նշել է, որ «պատգամավորությունն ու քաղաքականությունը տարբեր բաներ են»: Ինչը, իհարկե, ծիծաղելի է:
...Իսրայելի քաղաքական վերնախավի գերակշռող մասը արաբաիսրայեյական պատերազմների վետերաններ են՝ այդպես էր այդ երկրի ամբողջ պատմության մեջ: Այդ վետերանները երբեք չեն էլ ասել, թե քաղաքականությամբ չեն զբաղվում: Տարբերությունը, սակայն, այն է, որ նրանք գրագետ են»,–գրում է թերթի խմբագիրը»։
Առավել մանրամասն՝ «Առավոտ» թերթի այսօրվա համարում: