Եթե այսպես շարունակվի, ապա փոքր բիզնեսն ամենայն հավանականությամբ կգրանցվի Կարմիր գրքում. Ստեփան Ասլանյան
Վերջին տարիներին փոքր բիզնեսն այսպիսի աննախադեպ վիճակում չէր հայտնվել, ինչպիսի վիճակում գտնվում է այսօր: Տարեսկզբից բազմաթիվ խանութներ փակվեցին: Եթե այսպես շարունակվի փոքր բիզնեսն ամենայն հավանականությամբ կգրանցվի Կարմիր գրքում: Այսօր լրագրողների հետ հանդիպման ժամանակ նման կարծիք հայտնեց «Փոքր ձեռներեցությամբ զբաղվողների միության» նախագահ Ստեփան Ասլանյանը:
«Իշխանությունները փոխանակ քայլեր ձեռնարկելու` «Շրջանառության հարկի մասին» օրենքը փորձեց փաթաթել ձեռներեցների վզին: Առաջին հայացքից մեղմացնող թվացող այս օրենքը, բավականին գրավիչ է թվում, մինչդեռ խորը ուսումնասիրելիս պարզ է դառնում, որ սա ծուղակ է ձեռներցների համար: Մենք հարցի քննարկման շուրջ հանդիպեցինք նաև վարչապետի հետ և որոշվեց 3 ամսով հետաձգել օրենքի կիրառումը, որպեսզի կառավարությունը ևս կարողանա իրավիճակը քննարկել»,-նշեց բանախոսը:
Վերջինս տեղեկացրեց, որ միությունը գրավոր տարբերակով որոշակի առաջարկներ և ուղղումներ է ներկայացրել վարչապետին, որտեղ առաջարկել է, որպեսզի այն ձեռներեցները, ովքեր կարող են փաստաթղթավորվել թող 1 %-ով աշխատեն, ովքեր չեն կարող փաստաթղթավորվել՝ թող 3.5 %-ով աշխատեն:
Անդրադառնալով փակված ՓՄՁ-ներին' բանախոսը նշեց, որ սրանք հիմնականում խանութներն ու փոքր հացի ցեխերն են: «Մեծ առևտրի կենտրոններն իրենց հերթին մեծ վնաս հասցրին ՓՄՁ-ներին: Այս դաշտը պետք է կանոնակարգվի: Ստեղծվել են որոշակի քանակությամբ սուպերմարկետներ և առևտրի կոնետրոններ, ուստի բավական է, մնացածները թող տանեն Երևանից դուրս»,-եզրափակեց բանախոսը:
Վարդուհի Ստեփանյան